Եվրոպական մի շարք երկրների իրավապահ մարմինները ձերբակալել են Վրաստանի ինը քաղաքացու, որոնք ներգրավված են եղել եվրոպական երկրների գրադարաններից հազվագյուտ գրքերի գողության մեջ: Եվրոպական ոստիկանական գործակալության (Եվրոպոլ) տվյալներով՝ նրանց գործունեության արդյունքում հասցված ընդհանուր վնասը կազմում է 2,5 միլիոն եվրո:
Վրաստանում ապրիլի 24-ին ավելի քան 100 իրավապահների համատեղ գործողության ընթացքում չորս մարդ է ձերբակալվել: Դրա մասին ավելի վաղ հայտնել էր Վրաստանի գլխավոր դատախազի առաջին տեղակալ Բակուր Աբուլաձեն։
Խուզարկություններ են անցկացվել 27 օբյեկտներում, և առգրավվել է ավելի քան 150 գիրք, որոնց ծագումը հետագայում կպարզվի: Արդեն պարզվել է, որ հանցագործները գրքերից մեկը գողացել են Ֆրանսիայի գրադարաններից մեկից։ Ավելի վաղ նույն հանցախմբից ևս 5 մարդու ձերբակալել են Էստոնիայում, Ֆրանսիայում և Լիտվայում։
Եվրոպոլի տվյալներով՝ չարագործները եվրոպական գրադարաններում բնօրինակ հազվագյուտ գրքերը՝ հիմնականում ռուս գրողների, մասնավորապես՝ Ալեքսանդր Պուշկինի և Նիկոլայ Գոգոլի գրքերի առաջին հրատարակությունները փոխարինել են բարձր որակի կեղծ հրատարակություններով:
Որոշ դեպքերում նրանք ավելի բացահայտ են գործել՝ պարզապես ներխուժելով գրադարաններ և գողանալով հետաքրքրություն ներկայացնող գրքերը:
«Ընդհանուր առմամբ, ենթադրվում է, որ հանցախումբը պատասխանատու է առնվազն 170 գրքերի գողության համար, ինչի հետևանքով պատճառվել է շուրջ 2,5 միլիոն եվրոյի գույքային վնաս և անչափելի վնասներ հասարակությանը», - ասված է Եվրոպոլի հաղորդագրությունում:
Գողացված պատմական արտեֆակտներից մի քանիսն, ըստ փորձագետների, վաճառվել են Մոսկվայի և Սանկտ Պետերբուրգի աճուրդի տների միջոցով՝ դրանց վերադարձը գործնականում անհնարին դարձնելով։
Հետաքննությանը մասնակցել են Վրաստանի, Լիտվայի, Լեհաստանի, Ֆրանսիայհի և Շվեյցարիայի իրավապահ մարմինները, գործողությանը միացել են նաև Գերմանիան, Լատվիան, Ֆինլանդիան, Չեխիան և Էստոնիան։
Եվրոպական իրավապահ մարմինների աշխատակիցչներին աջակցել են Եվրոպոլը և Արդարադատության համագործակցության եվրոպական գործակալությունը:
