ՆԱՏՕ-ի գլխավոր քարտուղար Յենս Ստոլտենբերգն այցելել է Գերմանիայի Լագե բնակավայրում տեղակայված Շտայնհոֆ ավիաբազայի 73-րդ մարտավարական էսկադրիլիա և թռել Eurofighter կործանիչով։ Դրա մասին ապրիլի 25-ին հայտնել է գերմանական Norddeutscher Rundfunk ռադիոն։

«Ես անհամբեր սպասում եմ կործանիչով թռչելուն»,- թռիչքից առաջ ասել է Ստոլտենբերգը:

Ըստ Frankfurter Allgemeine Zeitung պարբերականի՝ Ստոլտենբերգն ու ռազմաօդային ուժերի օդաչուն Eurofighter կործանիչով օդ են բարձրացել տեղական ժամանակով 12:22-ին, թռիչքը տևել է մոտ մեկ ժամ:

ՆԱՏՕ-ի գլխավոր քարտուղարը վայրէջքից հետո ասել է, որ շատ տպավորված է Հյուսիսատլանտյան ռազմական դաշինքի տարբեր երկրների զենքերի համատեղելիությամբ։ Մասնավորապես, նա օրինակ է բերել շվեդական ռազմական ինքնաթիռի՝ գերմանական ինքնաթիռից վառելիք լիցքավորելու ունակությունը։

«ՆԱՏՕ-ն պատմության մեջ ամենահաջող ռազմական դաշինքն է, որն ընգրկում է 32 երկիր, բազմաթիվ քաղաքական կուսակցություններ, ունի տարբեր պատմություն և աշխարհագրություն, և չնայած մեր բոլոր տարբերություններին, միշտ կարողանում ենք համախմբվելւ մեր նպատակի՝ փոխադարձ պաշտպանության շուրջը»,- ընդգծել է Ստոլտենբերգը։