Ջամայկայի կառավարությունը նախատեսում է բարեփոխումներ իրականացնել մինչև 2025 թվականի հաջորդ համընդհանուր ընտրությունները, որպեսզի կտրվի բրիտանական միապետ Չարլզ III-ի անվանական իշխանությունից և դառնա հանրապետություն, ասել է Ջամայկայի փոխարտգործնախարար Ալանդո Տերելոնգը։
«Մենք հույս ունենք, որ մինչև 2025 թվականը մենք կավարտենք այս բարեփոխումները և կազատվենք բրիտանական միապետից՝ որպես մեր ժողովրդավարության ղեկավարի...»,- ասել է նա Independent թերթին տված հարցազրույցում։
Նրա խոսքով, այս կերպ իրենք կկարողանան մեծարել իրենց նախնիներին, ովքեր դաժանության ու ստրկության են ենթարկվել Մեծ Բրիտանիայի կողմից։ «Մենք պարտական ենք մեր սահմանադրությունը կազմողներին, մեր ազգային հերոսների կատարած աշխատանքին, որպեսզի Ջամայկան այժմ իսկապես ազատագրված և անկախ լինի», - ավելացրեց նա:
Հանրապետություն դառնալու համար Ջամայկան պետք է սահմանադրության նոր նախագիծ ներկայացնի տեղական խորհրդարանի երկու պալատների հաստատմանը, որից հետո երկրի կարգավիճակի վերաբերյալ հանրաքվե կանցկացվի, հիշեցնում է հրատարակությունը՝ վկայակոչելով իրավական և սահմանադրական հարցերի նախարար Մարլեն Մալահա Ֆորտեին։
Ինչպես ավելացնում է Տերելոնգը, Ջամայկան նաև փորձում է հասնել նրան, որ Բրիտանիան հանի վիզային սահմանափակումները կղզու քաղաքացիների համար՝ հաշվի առնելով նրանց պատմական կապերը։ Այսօր այն միակ երկիրն է, որը գտնվում է բրիտանական միապետի պաշտոնական իշխանության ներքո, որի բնակիչները ստիպված են վիզա խնդրել Մեծ Բրիտանիա մուտք գործելու համար: Նախարարի խոսքով՝ այս հարցում նախնական փոխզիջումը կարող է լինել ստեղծագործական մասնագիտությունների ներկայացուցիչների, գործարարների և կառավարության անդամների համար առանց վիզայի մուտքի թույլտվությունը։
