Ռուսաստանի և Ադրբեջանի արտգործնախարարները քննարկել են Լեռնային Ղարաբաղի հակամարտության կարգավորման հարցը

Հայաստանը և Ադրբեջանը դեռևս հեռու են Լեռնային Ղարաբաղի հակամարտության կարգավորման ուղղությամբ որոշակի համաձայնության հասնելուց։ Այս մասին հատարարել է Սերգեյ Լավրովը Ադրբեջանի արտգործնախարար Էլմար Մամեդյարովի հետ ունեցած հանդիպումից հետո տված համատեղ մամուլի ասուլիսի ժամանակ։

«Մենք կարծում ենք, որ ղարաբաղյան հակամարտությունը ենթակա է կարգավորման։ Այս մասին են խոսում բազմամյա կոնտակտները, որոնց շնորհիվ հաջողվել է հակամարտության առանցքային հարցերի շուրջ որոշակի համաձայնության գալ. դրանք, առաջին հերթին, Ադրբեջանի վերահսկողության տակ չգտնվող Ղարաբաղի շրջակա տարածքների վերադարձի, ինչպես նաև Լեռնային Ղարաբաղի կարգավիճակի որոշման մասին հարցերն են», - ասել է ՌԴ արտգործնախարարը։

Նրա խոսքով՝ դեռևս մի քանի առանցքային հարց կա, որի շուրջ անրաժեշտ է համաձայնության գալ։ Լավրովը նշել է նաև, որ դեռևս վաղ է այդ հարցերի շուրջ կողմերի ընդհանուր մոտեցումը տեսնելու համար։

Ադրբեջանի արտաքին գործերի նախարար Էլմար Մամեդյարովն իր հերթին նշել է, որ այսօր Բաքվի ամենակարևոր խնդիրը հայ-ադրբեջանական հարաբերություններն են։

«Ռուսաստանը լուրջ քայլեր է կատարում ղարաբաղյան հակամարտության կարգավորման ուղղությամբ։ Մենք այսօր պարոն Լավրովի հետ մանրամասն քննարկեցինք դա։ Առաջ շարժվելու որոշակի հեռանկար կա, բայց ամեն ինչ Ադրբեջանից կախված չէ։ Իհարկե, այս հարցում մեծ դեր պետք է խաղա նաև հայկական կողմը, որպեսզի ընդունի սեղանին դրված առաջարկները», - ասել է Մամեդյարովը։

Ասուլիսի վերջում ՌԴ արտգործնախարար Սերգեյ Լավրովը ընդգծել է, որ Մոսկվան և Բաքուն հաստատել են իրենց հետաքրքրությունը ռուս-ադրբեջանական միջտարածաշրջանային համաժողովին, որը նախատեսվում է անցկացնել այս տարվա աշնանը Ստավրոպոլում։

We use cookies to ensure that we give you the best experience on our website. You may delete and block all cookies from us, but certain parts of the site may not work properly.