ԱՄՆ-ի և Կատարի ռազմածովային ուժերը վերսկսել են համատեղ զորավարժությունները
Պարսից ծոցի դիվանագիտական ճգնաժամի սկսվելուց հետո առաջին անգամ Կատարը և ԱՄՆ-ն պատրաստվում են համատեղ ռազմածովային զորավարժություններ անցկացնել. այս մասին տեղեկացնում է «Ալ Ջազիրա» հեռուստաալիքը:
«Ալ Ջազիրա»-ի տեղեկությունների համաձայն՝ զորավարժություններին մասնակցելու համար կատարական Համադ նավահանգիստ են ժամանել ԱՄՆ-ի ռազմածովային ուժերը: Տեղեկացվում է նաև, որ ժամանումից անմիջապես հետո նավերի անձակազմերը հանդիպել են Կատարի ռազմածովային ուժերի հրամանատարության հետ: Այլ մանրամասներ հայտնի չեն:
Ավելի վաղ Պենտագոնը հայտարարել էր, որ Կատարի շուրջ ծագած իրավիճակը չի ազդել այդ երկրում ամերիկյան Էլ Ուդեյդ ռազմաբազայի աշխատանքի վրա, թեև որոշ դժվարություններ են առաջացել ռազմական գործողությունների երկարաժամկետ պլանավորման հետ: Ռազմաբազայում 11 հազար զինվորականներ կան ԱՄՆ-ից և միջազգային կոալիցիայի երկրներից: Ռազմաբազան մեծ նշանակություն ունի Իսլամական պետության դեմ գործողություններ իրականացնելու համար:
Ինչպես նշում է ՏԱՍՍ-ը, վերջերս Կատարի պաշտպանության նախարար Հալեդ բեն Մուհամեդ ալ-Աթըյյան հանդիպում է ունեցել Պենտագոնի ղեկավար Ջեյմս Մետիսի հետ, որի ընթացքում նրանք «քննարկել են համատեղ շահերը, ներառյալ ԻՊ-ի դեմ տարվող գործողությունները, Կատարի և հարևան երկրների միջև լարվածության նվազման կարևությունը»: Կողմերը քննարկել են նաև Կատարի կողմից McDonnel Douglas F-15 Eagle ամերիկյան կործանիչների ձեռքբերման վերջնական քայլերը, որոնց արժողությունը մոտավորապես 12 միլիարդ դոլար է:
Defense News լրատվականը, հղում կատարելով Սպիտակ տան աղբյուրներին, տեղեկացրել է, որ ԱՄՆ-ն կարող է զինամթերք մատակարարել նաև Սաուդյան Արաբիային: Մայիսի վերջին Դոնալդ Թրամփն իր առաջին պաշտոնական այցը կատարեց Ռիադ, որի արդյունքը եղավ ԱՄՆ-ի պատմության մեջ ռազմամթերքի ամենախոշոր գործարքը՝ 110 միլիարդ դոլար արժողությամբ:
Հիշեցնենք, որ հունիսի 5-ին Բահրեյնը, ԱՄԷ-ն, Սաուդյան Արաբիան, Եգիպտոսը, Եմենը, Լիբիան, Մալդիվյան հանրապետությունը, Մավրիկին, Մավրիտանիան, Կոմորյան կղզիները, Հորդանանը և Ջիբութին խզեցին դիվանագիտական կապերը Կատարի հետ ՝ նրան մեղադրելով ահաբեկչական և ծայրահեղական գաղափարախոսություններին աջակցելու մեջ: