Իրանի ռազմաօդային ուժերը հրթիռակոծել են ահաբեկիչների դիրքերը Սիրիայում
Իրանի «իսլամական հեղափոխության պահապանների» կորպուսը Սիրիայում ահաբեկիչների դիրքերի ուղղությամբ ուղարկել է վեց հրթիռ, որոնք հաջողությամբ խոցել են նախանշված բոլոր թիրախները։ Այս մասին հայտնում է Fars լրատվական գործակալությունը։
Աղբյուրի փոխանցմամբ՝ միջին հեռահարության 6 բալիստիկ հրթիռ է արձակվել Դեր Զորում գտնվող ահաբեկիչների դիրքերի ուղղությամբ։ Հրթիռներն, անցնելով Իրաքի օդային սահմահը, հաջողությամբ խոցել են թիրախները։
Աելի վաղ Իրանի Զինված ուժերը հաղորդագրություն էին տարածել, որ միջին հեռահարության «երկիր-երկիր» դասի հրթիռները բաց են թողնվել Քերմանշահ շրջանից։
«Ի պատասխան հունիսի 7-ին Թեհրանում տեղի ունեցած ահաբեկչության՝ Իրանի «իսլամական հեղափոխության պահապանների» կորպուսը հրթիռային հարվածներ է հասցրել ահաբեկիչների՝ Դեր Զորում գտնվող դիրքերին։ Հարվածների հետևանքով ոչնչացվել են մեծ թվով ահաբեկիչներ ինչպես նաև նրանց պատկանող զինտեխնիկա», - ասվում է Իրանի ԶՈւ տարածած հաղորդագրության մեջ։
Նշվում է նաև, որ հարվածները հասցվել են ահաբեկիչներին և նրանց սատարողներին հասկացնելու, որ Իրանի ժողովրդի դեմ հաջորդ նման ոտնձգության դեպքում դրա կազմակերպիչները և կատարողները կուղարկվեն դժոխք։
Հիշեցնենք, որ հունիսի 7-ին մի խումբ ահաբեկիչներ գրոհել էին Իրանի ազգային ժողովի շենքը: Ահաբեկչության հետևանքով զոհվել էր 18 մարդ, վիրավորվել էր՝ 50-ը։