Եվրահանձնաժողովը տուգանել է Google-ին 2,42 միլիարդ եվրոյով
Եվրոպական հանձնաժողովը 2,42 միլիարդ եվրոյով տուգանել է Google ընկերությանը՝ որոնողական համակարգերի շուկայում գերիշխող դիրքը չարաշահելու համար. այս մասին տեղեկացնում է CNN-ը:
«Եվրահանձնաժողովը 2,42 միլիարդ եվրո տուգանք է նշանակել Google-ին՝ Եվրամիության հակամենաշնորհային օրենսդրության կանոնները խախտելու պատճառով»,- ասվում է կառույցի հայտարարության մեջ:
Ինչպես նշում է CNN-ը, հանձնաժողովը պարզել է, որ ամերիկյան տեխնոլոգիական հսկան «սպառողներին իրական ընտրության հնարավորություն» չի տվել՝ օգտագործելով որոնողական համակարգը նրանց անարդացիորեն իր իսկ առևտրային հարթակ տանելու համար:
Հանձնաժողովի կարգավորողները հայտնել են, որ Google-ը պետք է փոխի իր գորելաոճը 90 օրվա ընթացքում, հակառակ դեպքում նրան նոր տուգանքներ են սպասվում:
«Այն, ինչ արել է Google-ը, հակասում է ԵՄ-ի հակամենաշնորհային օրենսդրությանը: Այն այլ ընկերություններին մրցակցելու և բարգավաճելու հնարավորություն չի տվել: Եվ ամենակարևորը, այն հնարավորություն չի տվել եվրոպացի գնորդներին ծառայությունների իրական ընտրություն կատարել և օգտվել դրանցից»,- ասել է հակամենաշնորհային հարցերով եվրահանձնակատար Մարգրեթ Վեստագերը:
Google-ի ներկայացուցիչն իր հերթին հայտարարել է, որ իրենք ցուցադրել են այն գովազդները, որոնք օգտակար են գնորդների և վաճառողների համար: Նա նշել է նաև, որ իրենք պատրաստվում են քննարկել Եվրահանձնաժողովի որոշումը և բողոքարկել այն:
Վեստագերը հայտնել է, որ Google-ի մրցակիցները կարող են փոխհատուցում պահանջել նրանից ԵՄ-ի դատարանների միջոցով: Նա ասել է, որ 100-ավոր ընկերություններ, այդ թվում և ամերիկյան, դժգոհել են Google-ի՝ առևտրային ծառայությունները ներկայացնելու ձևից:
CNN-ի փոխանցմամբ՝ Google-ի սեփականատեր Alphabet ընկերության բաժնետոմսերի նախնական շուկայական գինը նվազել է 1,2%-ով: