Թիլերսոնն ամփոփել է Թրամփի և Պուտինի հանդիպման արդյունքները

ԱՄՆ նախագահ Դոնալդ Թրամփը և ՌԴ նախագահ Վլադիմիր Պուտինը չեն նշանակել հաջորդ հանդիպման օրը. այս մասին լրագրողներին հայտնել է ԱՄՆ-ի պետքարտուղար Ռեքս Թիլերսոնը:

«Առաջնորդների հանդիպումը կառուցողական էր, նրանց միջև ակնհայտորեն փոխադարձ համակրանք ձևավորվեց: Դա շատ լավ սկիզբ էր»,- կարծում է պետքարտուղարը:

Թիլերսոնի խոսքերով՝ Թրամփն ու Պուտինը երկար ժամանակ քննարկել են սիրիական հարցը, սակայն նախկին խնդիրների վերաբերյալ վեճերը շարունակական չեն եղել: Նախագահները չեն ցանկացել ավարտել հանդիպումը, անգամ առաջին տիկին Մելանիա Թրամփն է փորձել համոզել նրանց ամփոփել զրույցը, սակայն ապարդյուն:

ԱՄՆ-ի արտաքին քաղաքական գերատեսչության ղեկավարի կարծիքով՝ Վաշինգտոնը և Մոսկվան նույն նպատակն են հետապնդում Սիրիայում: Այդուհանդերձ, նա չի բացառել, որ ռուսական դիրքորոշումն ավելի հիմնավոր է, քան ամերիկյանը:

Նա նշել է նաև, որ զրույցի ընթացքում Թրամփը մի քանի անգամ խոսել է ԱՄՆ-ի նախընտրական գործընթացին Ռուսաստանի ենթադրյալ միջմտության մասին: Ռուսական առաջնորդն իր հերթին հերքել է այդ միջամտությունը:

Պետքարտուղարը հայտնել է, որ Թրամփն ու Պուտինը համաձայնության են եկել կիբերանվտանգության հարցերով զբաղվող աշխատանքային խումբ ստեղծելու վերաբերյալ:

Բացի այդ, առաջնորդները համակարծիք են եղել Սիրիայի ապագա ղեկավարության վերաբերյալ քննարկումներ անցկացնելու հարցում: ԱՄՆ-ի կարծիքով` Սիրիայի ներկայիս առաջնորդ Բաշար Ասադը երկար քաղաքական կյանք չի ունենա, բայց թե ինչպես կհեռանա իշխանությունից դեռևս պարզ չէ:

«ԱՄՆ-ի, Ռուսաստանի և Հորդանանի միջև հուշագիր է կնքվել՝ Սիրիայի հարավարևուտքում անվտանգության գոտի ստեղծելու վերաբերյալ: Դա բխում է Հորդանանի շահերից և ընդհանուր առմամբ Սիրիայում տիրող դժվար իրավիճակի բաղկացուցիչ մասն է: Կարծում եմ՝ սա ապացուցում է, որ ԱՄՆ-ն և Ռուսաստանը կարող են միասին աշխատել Սիրիայում»,- Թիլերսոնի խոսքերը փոխանցում է ՏԱՍՍ-ը:

Նա հավելել է, որ ԱՄՆ-ն պատրաստվում է Ռուսաստանից խնդրել ավելին անել Հյուսիսային Կորեայի շուրջ ստեղծված իրավիճակին լուծում տալու համար: «Փհենյանի հարցում մենք որոշակի մարտավարական տարաձայնություններ ունենք Ռուսաստանի հետ: Նախագահ Պուտինը կողմ է այդ ծրագրերի սառեցմանը, սակայն եթե իրավիճակը դիտարկենք վերջին 25 տարվա կտրվածքով, կհասկանանք, որ դա պետք է կատարվեր շատ վաղուց, իսկ այսօր Հս. Կորեան զգալի միջուկային հնարավորություններ ունի: Մենք ցանկանում ենք բանակցությունների միջոցով հասկացնել Փհենյանին, որ անհրաժեշտ է փոխել ծրագրի դադարեցման ուղին, այլ ոչ թե թողնել այժմյան մակարդակի վրա»,- ասել է պետքարտուղարը:

Ամփոփելով իր ելույթը՝ Թիլերսոնը հայտնել է, որ ԱՄՆ-ն և Ռուսաստանը կողմ են երկկողմ հարաբերություններում «առաջ շարժվելուն»՝ կանգ չառնելով Մոսկվային վերագրվող միջամտության և ԱՄՆ-ի Սենատի կողմից հակառուսական պատժամիջոցների խստացման վրա: