ԱՄՆ-ի Ներկայացուցիչների պալատը հաստատել է հակառուսական նոր պատժամիջոցների մասին օրինագիծը

ԱՄՆ-ի Կոնգրեսի Ներկայացուցիչների պալատը հավանություն է տվել Ռուսաստանի, Իրարի և Չինաստանի դեմ պատժամիջոցներ կիրառելու մասին օրինագծին. քվեարկության արդյունքները փոխանցում է Ռիա Նովոստի-ն:

Փաստաթղթի օգտին է քվեարկել 419, իսկ դեմ՝ 3 կոնգրեսական: Դրա ընդունման համար անհրաժեշտ էր պալատի 435 անդամների երկու երրորդի հավանությունը: Քվեարկության արդյունքները ցույց են տալիս, որ պալատը հեշտությամբ կարող է հաղթահարել նախագահի վետոն, եթե Սենատի հաստատումից հետո նա հրաժարվի ստորագրել փաստաթուղթը:

Ինչպես նշում է Ռիա Նովոստի-ն, ընդուման դեպքում նոր պատժամիջոցները կարող են դառնալ ամենամասշտաբային և բարդ փաթեթն սկսած 2014 թ.-ից, երբ Ղրիմի, Ուկրաինայի դեպքերի և ԱՄՆ-ի ընտրություններին այսպես կոչված «ռուսական միջամտության» պատճառով սահմանափակող միջոցառումների մի ամբողջ փաթեթ ընդունվեց Ռուսաստանի քաղաքացիների և ընկերությունների դեմ:

Սպիտակ տունը հասկացրել է, որ ընդհանուր առմամբ աջակցում է պատժամիջոցների չեղարկման հարցում պետության առաջնորդի լիազորությունները սահմանափակող փաստաթղթին:

Օրինագիծի մի կետի համաձայն՝ նախագահը պարտավորվում է օրենսդիրների հետ նախօրոք համաձայնեցնել պատժամիջոցների մեղմացումները կամ չեղարկումը: Նախկին սահմանափակող միջոցները, որպես կանոն, ներկայացվում էին նախագահի և ԱՄՆ-ի ֆինանսների նախարարության հրամանների համաձայն:

Կրեմլում հայտարարել են, որ «խիստ բացասաբար են» վերաբերում օրինագծին, իսկ Եվրամիությունում այն անվանել են «Վաշինգտոնի միակողմանի գործողություն»:

Ռիա Նովոստի-ի փոխանցմամբ՝ Բրյուսելը նույնպես բացասաբար է արձագանքել ԱՄՆ-ի ծրագրերին, քանի որ փաստաթղթի կետերից մեկը սահմանափակող միջոցառումներ է ենթադրում ՌԴ-ի էներգետիկ նախագծերի նկատմամբ՝ ներառյալ Եվրոպայի նախագծերը: Ամերիկյան ընկերությունները նույնպես դեմ են այդ կետին, քանի որ օրինագծի հաստատումը կվնասի նաև նրանց շահերին:

Ավելի վաղ Ռուսաստանի ԱԳՆ-ում հայտարարել էին, որ Մոսկվան հետևում է Կոնգրեսի՝ պատժամիջոցների մասին նոր օրինագծի քննարկումներին, և հավելել, որ այդ նախաձեռնությունը ռուս-ամերիկյան հարաբերությունների մասին անհանգստանալու տեղիք է տալիս: