Պենտագոնը խորհուրդ է տալիս չհետաձգել Հարավային Կորեայի հետ համատեղ զորավարժությունները

Միացյալ Նահանգները և Հարավային Կորեան չեն հրաժարվում անցկացնել հաջորդ շաբաթ նախատեսած միացյալ զորավարժությունները՝ հաշվի չառնելով Փհենյանի և Պեկինի դիրքորոշումն այս հարցի շուրջ։ Այս մասին հայտնում է «Ռոյթերս» լրատվական գործակալությունը՝ հղում կատարելով Պենտագոնի աղբյուրներին։

«Իմ խորհուրդն է մեր ղեկավարությանը՝ չհետաձգել զորավարժությունները։ Դրանք անհրաժեշտ են մեր զինծառայողների մարտունակությունը պահանելու և մեր անվտանգությունն ապահովելու համար։ Քանի դեռ առկա է Հյուսիսային Կորեայից եկող սպառնալիքը, մենք պետք է պահպանենք պատրաստվածության մեր բարձր մակարդակը, որպեսզի կարողանանք անհրաժեշտության դեպքում արձագանքել», - հայտարարել է ԱՄՆ-ի Զինված ուժերի շտաբի պետերի միացյալ հանձնաժողովի նախագահ Ժոզեֆ Դենֆորդը։

Ամենամյա զորավարժություններին, որոնք ծրագրված է մեկնակել առաջիկա երկուշաբթի՝ օգոստոսի 21-ին, ներգրավված են լինելու տասնյակ հազարավոր ամերիկացի և հարավկորեացի զինծառայողներ։ Փհենյանն արդեն հայտարարել է, որ այդ զորավարժությունները դիտարկում է որպես պատերազմի նախապատրաստութուն։

Հիշեցնենք, որ օգոստոսի 8-ին Փհենյանը հայտարարել էր խաղաղօվկիանոսյան Գուամ կղզում ամերիկյան ավիաբազային հրթիռային հարված հասցնելու պատրաստակամության մասին: Կիմ Չեն Ընի հրամանի դեպքում՝ հյուսիսկորեական զինվորականները կարձակեն մայիսի 14-ին փորձարկված միջին հեռահարության «Հվասոն-12» բալիստիկ հրթիռը:

Օգոստոսի 13-ին Դոնալդ Թրամփը հայտարարել էր, որ բացի դիվանագիտական և տնտեսական միջոցառումներից՝ Վաշինգտոնը պատաստ է ուժ կիրառել Հս. Կորեայի կողմից եկող միջուկային սպառնալիքը վերացնելու համար: