Շվեդիայում նվազում է ՆԱՏՕ-ին անդամակցելուն կողմ հանդես եկողների թիվը

Շվեդիայում ՆԱՏՕ-ին անդամակցելու կողմնակիցների թիվը գնալով նվազում է։ Այս մասին են վկայում Ipsos սոցիոլոգիական կենտրոնի անցկացրած հարցման արդյունքները։

Եթե մեկ տարի առաջ Հյուսիսատլանտյան դաշինքին անդամակցելուն դեմ էին հարցվածների 40%-ը, ապա 2017 թ․ դեկտեմբերիին արդեն այդ թիվն աճել է՝ հասնելով 44%-ի։ Թագավորության՝ ՆԱՏՕ-ին անդամակցելուն կողմ է հարցվածների միայն 31%-ը։ 2016 թ․ համեմատ այս թիվը նվազել է 4 տոկոսային կետով։

«Անցկացվող հետազոտությունները ցույց են տալիս, որ Շվեդիայում ՆԱՏՕ-ին անդամացությանը կողմ հանդես եկողների թիվն անշեղորեն նվազում է։ Սրան զուգընթաց աճում է հակառակ կարծիք ունեցողների թիվը։ Արդեն նկատելի է դառնում Շվեդիայի բնակչության բացասական վերաբերմունքը Դաշինքին», - նշում է Ipsos սոցիոլոգիական կենտրոնի մասնագետը։

Հատկանշական է նաև, որ Շվեդիայում երկրի զինված ուժերի նկատմամբ վստահություն ունի հարցվածների ընդամենը 14%-ը (2016 թ․ դեկտեմբերին այս ցունանիշը կազմում էր 10%, - խմբ․)։ Հարցվածների կեսից ավելին (51%) կասկածում է, որ ներխուժման դեպքում երկրի զինված ուժերն ի վիճակի են դիմակայել հակառակորդին։