Անկարան կարծում է, որ ռուսական Ս-400-ի ձեռքբերումը չի խանգարի ամերիկյան կործանիչներ գնելուն
Թուրքիայի և Ռուսաստանի միջև Ս-400 զենիթահրթիռային համակարգի գնման մասին համաձայնությունը չի խանգարի ամերիկյան Ֆ-35 կործանիչների ձեռքբերմանը։ Այս մասին հայտարարել է Թուրքիայի պաշտպանության նախարար Նուրեթթին Ջանիքլին։
Ավելի վաղ Թուրքիայի խորհրդարանի՝ միջազգային հարցերով հանձնաժողովի ղեկավար Վոլկան Բոզքըրը հայտարարել էր, որ ԱՄՆ Կոնգրեսը կարող է արգելել Ֆ-35 կործանիչների վաճառքը Թուրքիային՝ որպես պատասխան քայլ ռուսական Ս-400 համակարգի ձեռքբերման։ Այս հայտարարությունից առաջ ամերիկացի կոնգրեսականները դիմել էին պետքարտուղարություն՝ խնդրելով պարզաբանել, արդյոք արժե պատժամիջոցներ կիրառել Թուրքիայի նկատմամբ։
«Ս-400-ի ձեռքբերման հետ խնդիրներ չկան։ Այն կարող է գնվել պայմանավորված ժամկետներից ավելի վաղ։ Այն չի ազդի ամերիկյան Ֆ-35-ի ձեռքբերման վրա», - ասել է Ջանիքլին։
Հիշեցնենք, որ նախորդ տարվա սեպտեմբերի 12-ին Թուրքիայի նախագահ Ռեջեփ Թայիփ Էրդողանը հայտարարել էր, որ Մոսկվայի հետ արդեն կնքվել է Ս-400-ի գնման համաձայնագիրը, և նույնիսկ կանխավճար է տրվել։ Սեպտեմբերի վերջին այս լուրը հաստատել էր նաև ՌԴ նախագահի՝ ռազմատեխնիկական համագործակցութան հարցերով օգնական Վլադիմիր Կոժինը՝ ընդգծելով, որ այդ հարցն արդեն «չի քննարկվում»։
Նշենք, որ առաջին անգամ Թուրքիան Ս-400 համակարգով հետաքրքրվել է դեռ 2009 թվականին: Այն ժամանակ, սակայն, համագործակցությունը դադարեցվել է:
Հակաօդային պաշտպանության զենիթահրթիռային Ս-400 համակարգը նախատեսված է բալիստիկ հրթիռների և ինքնաթիռների խոցման համար: Թիրախները կարողանում է խոցել մինչև 400 կմ հեռավորության վրա: