Լավրովն օրինակելի է համարում Հայաստանի բազմավեկտոր արտաքին քաղաքականությունը
Եվրոպական միությունը պետք է հրաժարվի հետխորհրդային երկրների հետ հարաբերություններում «կամ Ռուսաստանը կամ Եվրամիությունը» արատավոր տրամաբանությունից։ Այս մասին հայկական լրատվամիջոցների հետ զրույցում հայտարարել է ՌԴ արտաքին գործերի նախարար Սերգեյ Լավրովը։
Նա ընդգծել է, որ պետք չէ «հետխորհրդային երկրներին դնել ընտրության առջև․ կամ Ռուսաստանը, կամ Արևմուտքը»։
«Սա պարզապես գաղափարայնացված և քաղաքականացված մոտեցում է», - նշել է Լավրովը։
«Հայաստանն իր օրինակով ցույց է տալիս, որ գործնականում ընդհանրապես անիմաստ չէ հարաբերությունները զարգացնել բոլոր ուղղություններով։ Ընդհակառակը, սա հաղթող քաղաքականություն է և ձեռնտու է տվյալ պետությանը», - շարունակել է ՌԴ արտաքին քաղաքական գերատեսչության ղեկավարը։
Նրա խոսքով՝ Հայաստանը քայլ է կատարել ճիշտ ուղղությամբ՝ Եվրամիության հետ հարաբերությունները տեղափոխելով այլ հարթություն։
«ԵՄ-ը պետք է հրաժարվի «կամ կամ»-ի քաղաքականությունից, ինչը հանգեցրեց 2014 թ․ Ուկրաինայի դեպքերին։ Սա շատ կարևոր է այն բանի համար, որ չխախտվեն Հայաստանի, Ադրբեջանի կամ «Արևելյան գործընկերության» անդամ մյուս պետությունների իրավունքները և վնաս չհասցվի նրանց շահերին։ Սա հավասար է նրան, որ նշված պետությունը զրկվի իր բոլոր հարևանների հետ հարաբերությունները լիարժեք զարգացնելու և համագործակցելու հնարավորությունից», - ընդգծել է նախարարը՝ հավելելով, որ Մոսկվան դրական է նայում ԵՄ-ի և ԵԱՏՄ-ի հետագա հարաբերություններին։
Լավրովը հիշեցրել է, որ դեռ երեք տարի առաջ ԵԱՏՄ-ը Եվրամիությանն առաջարկել էր համագործակցել, սակայն վերջինս քաղաքական դրդապատճառներից ելնելով հրաժարվել էր Եվրասիական տնտեսական միությանը ճանաչել որպես լիիրավ գործընկեր։
«Եվրոպական տնտեսական հանձնաժողովը, ինչպես նաև Եվրոպական արտաքին քաղաքականության ծառայությունը սկսել է մասնագետների մակարդակով կապ հաստատել Եվրասիական տնտեսական հանձնաժողովի հետ։ Շատ կարևոր է, որ այս կապերն ավելի ամրապնդվեն և դառնան շարունակական։ Կարծում եմ՝ սա հենց առաջին քայլն է, որովհետև կյանքը ստիպելու է մեր եվրոպացի գործընկերներին աշխատել Եվրասիական տնտեսական միության և Եվրասիական տնտեսական հանձնաժողովի հետ, որն, ի դեպ, ինչպես և Հավաքական անվտանգության պայմանագրի կազմակերպությունը (ՀԱՊԿ), ղեկավարում է Հայաստանի Հանրապետության քաղաքացի», - Լավրովի խոսքերը մեջբերել է ՏԱՍՍ-ը։
Աղբյուր՝ http://tass.ru/politika/5105340?utm_source=facebook.com&utm_medium=socia...