ԱՄՆ Կոնգրես է մտցվել «Հյուսիսային հոսք-2» գազատարի նկատմամբ պատժամիջոցներ սահմանելու մասին օրինագիծ
ԱՄՆ-ի Վայոմինգ նահանգը ներկայացնող սենատոր Ջոն Բարասոն Կոնգրես է մտցրել «Հյուսիսային հոսք-2» ծրագրի նկատմամբ պատժամիջոցներ սահմանելու մասին օրինագիծ։ Այս մասին գրում է Ռիա Նովոստի-ն՝ հղում կատարելով սենատորի հայտարարությանը։
Նրա խոսքով՝ օրինագիծը կօգնի ՆԱՏՕ-ի անդամ պետություններին խուսափել Ռուսաստանի կողմից քաղաքական հարկադրանքից և տարատեսակ մանիպուլյացիաներից։
«Եվրոպայում դաշնակից երկրների հետ էներգետիկ անվտանգության ոլորտում համագործակցության մասին օրենքը կբարձրացնի ՆԱՏՕ-ի անդամ պետությունների էներգետիկ անվտանգությունը՝ վերջիններիս ներկայացնելով ամերիկյան ավելի կայուն և վստահելի էներգառեսուրսներ։ Այն նաև պատժամիջոցներ է սահմանում Nord Stream II գազատարի նկատմամբ, որով բնական գազը Ռուսաստանից հասցվելու է Գերմանիա», - ասվում է սենատորի տարածած հայտարարության մեջ։
ԱՄՆ նախագահ Դոնալդ Թրամփը հուլիսի 16-ին ՌԴ նախագահ Վլադիմիր Պուտինի հետ ունեցած համատեղ մամուլի ասուլիսի ժամանակ հայտարարել էր, որ Միացյալ Նահանգները մրցակցելու է «Հյուսիսային հոսք-2»-ի հետ բնական հեղուկ գազի օգնությամբ։
Վլադիմիր Պուտինն, իր հերթին, ամերիկացի գործընկերոջը հավաստիացրեց, որ Մոսկվան պատրաստ է պահպանել Ուկրաինայով անցնող տարանցիկ գազամուղը նույնիսկ «Հյուսիսային հոսք-2»-ի կենսագործումից հետո։
Ավելի ուշ Fox News-ին տված հարցազրույցի ժամանակ Թրամփը հայտարարել էր, որ Գերմանիան իրավունք ունի մասնակցել գազատարի կառուցման աշխատանքներին, «սակայն դա շատ բարդ կլինի, քանի որ այդ երկիրը ՆԱՏՕ-ի անդամ է»։
«Հյուսիսային հոսք-2» ծրագիրը, որի վրա պետք է ծախսվի մոտ 9,5 միլիարդ եվրո, նախատեսում է կառուցել գազատար խողովակների երկու գիծ՝ տարեկան 55 միլիարդ խորանարդ մետր հզորությամբ։ Այսպես՝ ռուսական գազն, անցնելով Բալթիկ ծովով, պետք է հասնի մինչև Գերմանիա։