ԱՄՆ Կոնգրեսը սառեցրել է F-35 կործանիչների մատակարարումը Թուրքիային

ԱՄՆ Կոնգրեսը սառեցրել է ամերիկյան F-35 հինգերորդ սերնդի կործանիչների մատակարարումը Թուրքիային։ Այս որոշումը կապված է Անկարայի կողմից ռուսական Ս-400 զենիթահրթիռային համակարգը գնելու մտադրության հետ։ Այս մասին գրում է The Washington Post թերթը։

Համապատասխան փոփոխությունը մտցվել է 2019 թ․ պաշտպանական բյուջեի ծրագրում։ Կոնգրեսի երկու պալատներն էլ հավանության են արժանացրել փոփոխությունը։

F-35-ի ճակատագրի վերաբերյալ վերջնական որոշումը կայացվելու է այն ժամանակ, երբ Պենտագոնը կվերլուծի մատակարարման արգելքի հետևանքները։

Ինչպես հայտնում է The Hill-ը, պաշտպանական գերատեսչությունը 90 օրվա ընթացքում պետք է Կոնգեսին ներկայացնի զեկույց այն մասին, թե ինչ հետևանքներ կարող է ունենալ F-35 կործանիչների մատակարարման արգելքը Վաշինգտոնի և Անկարայի հարաբերությունների, ինչպես նաև վերջինիս կողմից Ս-400-ի ձեռքբերման ծրագրերի վրա։

Հատկանշական է, որ ավելի վաղ Պենտագոնի ղեկավար Ջեյմս Մեթիսը Կոնգրեսին կոչ էր արել հրաժարվել կործանիչների մատակարարման արգելքի մասին մտքից։

Անկարայի և Վաշինգտոնի հարաբերությունները սրվել են նախորդ տարվա դեկտեմբերին, երբ Թուրքիան և Ռուսաստանը համաձայնագիր կնքեցին ռուսական Ս-400 զենիթահրթիռային համակարգերի ձեռքբերման վերաբերյալ։

ԱՄՆ-ը և ՆԱՏՕ-ն բազմիցս քննադատել են Թուրքիային Մոսկվայի հետ համաձայնագիր կնքելու համար։ ԱՄՆ պետքատուղարի օգնականը հայտարարել է, որ Ս-400-ի ձեռքբերումը կարող է բացասականորեն ազդել ամերիկյան կործանիչների մատակարարման վրա։ Թուրքիայի արտաքին գործերի նախարարությունն, իր հերթին, հայտարարեց, որ Անարան միջոցներ կձեռնարկի Վաշինգտոնի դեմ, եթե վերջինս փորձի խոչընդոտել կործանիչների մատակարարմանը։