Ռուսաստանն, ի տարբերություն ԱՄՆ-ի, հավատարիմ է Միջին և ցածր հեռահարության հրթիռների մասին պայմանագրի դրույթներին․ Պեսկով

Ռուսաստանն, ի տարբերություն ԱՄՆ-ի, եղել և մնում է հավատարիմ Միջին և ցածր հեռահարության հրթիռների մասին համաձայնագրի դրույթներին։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը։

«Դուք գիտեք, որ նախագահ Պուտինը բազմիցս կտրականապես հերքել է այն մեղադրանքները, թե Ռուսաստանն իբր խախտում է ՄՑՀՀՊ-ի դրույթները։ Ի պատասխան, մենք բավականին մասնագիտական կերպով տարբեր ապացույցներ հավաքեցինք, որ հենց ԱՄՆ-ն է խախտում պայմանագրի դրույթները՝ տեղադրելով հակահրթիռներ, որոնք ի վիճակի են լինել ոչ միայն կալանող, այլ նաև միջուկային մարտագլխիկներ կրելու ունակ հրթիռներ, որոնք ոչ այլ ինչ են, քան հենց միջին և ցածր հեռահարության հրթիռներ», - ասել է Պեսկովը՝ մեկնաբանելով Թրամփի այն հայտարարությունը, որ հենց Ռուսաստանն է խախտում ՄՑՀՀՊ-ի դրութները։

Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել էր, որ իրենք չեն պատրաստվում հետևել Միջին և ցածր հեռահարության հրթիռների մասին պայմանագրի դրույթներին և ցանկանում են դուրս գալ դրանից, քանի որ Մոսկվան չի կատարում պայմանագրի պահանջները։

Թրամփը, մեկնաբանելով ՄՑՀՀՊ-ից դուրս գալու որոշումը, նշել է, որ Միացյալ Նահանգները շարունակելու է զարգացնել իր զենքերը։

ՌԴ արտաքին գործերի փոխնախարար Սերգեյ Ռիբկովը հայտարարել է, որ պատրասվում է ՄՑՀՀՊ-ից Վաշինգտոնի դուրս գալու մասին մանրակրկիտ բացատրություններ ստանալ ԱՄՆ նախագահի՝ ազգային անվտանգության հարցերով խորհրդական Ջոն Բոլթոնից, որն առաջիկա կիրակի այցելելու է Մոսկվա։

Աղբյուր՝  https://ria.ru/politics/20181022/1531177140.html