Պեսկովը մեկնաբանել է Պուտինի և Նեթանյահուի հանդիպման չեղարկման մասին լուրերը

ՌԴ նախագահ Վլադիմիր Պուտինի և Իսրայելի վարչապետ Բենիամին Նեթանյահուի միջև հանդիպում չի ծրագրվել։ Այս մասին, ինչպես հայտնում է Ռիա Նովոստի-ն, հայտարարել է ՌԴ նախագահի մամուլի ծառայության ղեկավար Դմիտրի Պեսկովը։

Ավելի վաղ Իսրայելի արտաքին գործերի նախարարությունը հայտնել էր, որ Բենիամին Նեթանյահուն պատրաստվում է նոյեմբերի 11–ին Փարիզում հանդիպում ունենալ ՌԴ նախագահ Վլադիմիր Պուտինի հետ։

Նոյեմբերի 7-ին «ԿԱՆ» հեռուստառադիոընկերությունը հայտնել էր, որ Ռուսաստանը և Իսրայելը համաձայնության են եկել երկրի ղեկավարների հանդիպման շուրջ, սակայն այն չեղարկվել է Ֆրանսիայի իշխանությունների խնդրանքով։ Փարիզում խնդրել են չեղարկել Առաջին համաշխարհային պատերազմի ավարտի հարյուրամյակին նվիրված միջոցառումների շրջանակում արտասահմանյան հանդիպումները։

Ավելի վաղ հայնտի էր դարձել նաև, որ չեղարկվել է Թրամփի և Պուտինի՝ նոյեմբերի 11-ին Փարիզում նախատեսված հանդիպումը։ Ռուսական լրատվամիջոցների փոխանցմամբ՝ դա տեղի է ունեցել Ֆրանսիայի նախագահ Էմանուել Մակրոնի խնդրանքով։ Նրա կարծիքով՝ ԱՄՆ-ի և Ռուսաստանի նախագահների հանդիպումը կարող էր ավելի մեծ ուշադրության արժանանալ, քան հենց այն բուն միջոցառումը, որի շրջանակներում պետք է տեղի ունենային բանակցությունները։

Կրեմլի մամուլի խոսնակ Դմիտրի Պեսկովը հրաժարվել է մեկնաբանել այս տեղեկությունը։