ԱՄՆ Ներկայացուցիչների պալատը կոչ է անում պատժամիջոցներ կիրառել «Հյուսիսային հոսք 2» ծրագրի նկատմամբ
ԱՄՆ Կոնգրեսի Ներկայացուցիչների պալատն ընդունել է բանաձև, որում ԵՄ անդամ պետություններին կոչ է անում հրաժարվել «Հյուսիսային հոսք 2» գազատարի շինարարությունից, ինչպես նաև հանդես է եկել ծրագրի դեմ պատժամիջոցներ սահմանելու առաջարկով։ Փաստաթուղթն ընդունվել է Կոնգրեսի ստորին պալատում անցկացված քվեարկությամբ։
Բանաձևը, որը կրում է ընդամենը դեկլարատիվ բնույթ և ենթակա չէ պարտադիր կատարման, խիստ քննադատության է ենթարկում վերոնշյալ էներգետիկ նախագիծը՝ նշելով պատճառներ, թե ինչու պետք է դրանից հրաժարվել։ Ամերիկացի օրեսնդիրների կարծիքով ««Հյուսիսային հոսք 2» ծրագիրը մեկ քայլ հետ է եվրոպական էներգաանվտանգության և ԱՄՆ-ի շահերի տեսանկյունից»։
Օրենսդիրները նախագահ Թրամփին կոչ են անում ամեն ինչ անել «եվրոպական էներգաանվտանգությունն ապահովելու և Եվրամիությանը ռուսական կախվածությունից փրկելու համար»։
Ավելի վաղ ԱՄՆ պետքարտուղարի օգնական Ֆրենսիս Ֆենոնը հայտարարել էր, որ Միացյալ Նահանգները դեմ է «Հյուսիսային հոսք 2» ծրագրին և կողմերին կոչ է անում հրաժարվել դրանից։ Նրա պնդմամբ՝ «Հյուսիսային հոսք 2»-ը և «Թուրքական հոսք»-ի ընդլայնված տարբերակը ոչ թե կոմերցիոն, այլ քաղաքական ծրագրեր են։
«Հյուսիսային հոսք 2» ծրագիրը նախատեսում է գազատարի կառուցում, որը կարող է Բալթիկ ծովի ռուսական ափերից տարեկան 55 միլիարդ խորանարդ մետր գազ հասցնել մինչև Գերմանիա։ Գազատարի երկարությունը կազմելու է 1200 կիլոմետր։ Այս ծրագրին դեմ են մի քանի պետություններ, մասնավորապես՝ Ուկրաինան, որը վախենում է կորցնել ռուսական գազի տրանզիտից ստացվող եկամուտները, և ԱՄՆ-ը, որն էլ իր հերթին ցանկանում է Եվրոպա մատակարարել իր բնական գազը։