Քաբուլում կառավարական համալիրի վրա տեղի ունեցած հարձակման հետևանքով զոհերի թիվը հասել է 43-ի
Աֆղանստանի մայրաքաղաք Քաբուլում կառավարական համալիրի վրա տեղի ունեցած հարձակման հետևանքով զոհերի թիվը հասել է 43-ի։ Այս մասին տեղեկացնում է Աֆղանստանի առողջապահության նախարարությունը։
Ավելի վաղ հաղորդվում էր 27 զոհի մասին։ Առողջապահության նախարարության տվյալների համաձայն՝ ևս 10 մարդ վիրավորվել է։
Հիշեցնենք, որ դեկտեմբերի 24-ին Քաբուլում՝ հասարակական աշխատանքների նախարարության շենքում երեք պայթյուն էր որոտացել։ Պայթյուններից հետո զինված անձինք ներխուժել էին շենք և գերի վերցրել բազմաթիվ մարդկանց։
Ավելի ուշ Tolo News-ը հաղորդեց, որ երկրի հատուկ ծառայությունները կարողացել են ազատագրել շենքը՝ ոչնչացնելով երեք ահաբեկչի։
Հատկանշական է, որ երկրում գործող որևէ ծայրահեղական խմբավորում դեռ չի ստանձնել տեղի ունեցած հարձակման պատասխանատվությունը։