Ռուսաստանն սկսել է «Փոսեյդոն» համակարգի ստորջրյա փորձարկումները
Ռուսաստանում սկսվել են միջուկային մարտագլխիկներ կրող «Փոսեյդոն» ռազմավարական անօդաչուի ստորջրյա փորձարկումներ։ Այս մասին գրում է ՏԱՍՍ-ը՝ հղում կատարելով ռազմական աղբյուրին։
Նշվում է, որ սրոտջրյա փորձարկումներն իրականացվում են ջրային այն տարածքներում, որոնք պաշտպանված են հավանական հակառակորդի հետախուզական միջոցներին։
Լրատվականը գրում է, որ փորձարկումները կատարվում են 2018-2027 թ․թ․ սպառազինության պետական ծրագրի շրջանակում։
Հուլիսին ՌԴ պաշտպանության նախարարությունը հրապարակել էր տեսանյութ օվկիանոսային բազմապրոֆիլ «Փոսեյդոն» համակարգի մասին, որն ստեղծվել է «Ստատուս 6» ծրագրի շրջանակում։
Այս անօդաչու ստորջրյա համակարգի մասին առաջին անգամ հայտնի էր դարձել դեռ 2015 թվականին։ Այս տարվա մարտին ՌԴ նախագահ Վլադիմիր Պուտինը պաշտոնապես հայտարարել է այդ զենքի գոյության մասին։
«Փոսեյդոն»-ի տակտիկատեխնիկական հստակ նկարագրությունը դեռ չի հրապարակվում։ Հայնտի է միայն, որ այն հագեցած է նորարարական միջուկային էներգակիրով և կարող է անսահման հեռավորություն անցնել ամենամեծ խորություններում։
«Փոսեյդոն»-ը համարվում է զանգվածային ոչնչացման զենք․ նախատեսված է հակառակորդի տնտեսական օբյեկտները ոչնչացնելու համար։