ՌԴ հատուկ ծառայությունները Մոսկվայում ահաբեկչություններ կազմակերպելու մեղադրանքով ձերբակալել են ԻՊ ահաբեկիչների

«Իսլամական պետություն» ահաբեկչական խմբավորման 5 զինյալներ ձերբակալվել են Մոսկվայում մի շարք ահաբեկչական գործողություններ ծրագրելու մեղադրանքով։ Այս մասին տեղեկացնում է ՌԴ Անվտանգության դաշնային ծառայության մամուլի բաժինը։

Աղբյուրի փոխանցմամբ ահաբեկիչների խումբը ձևավորել է Բաբաև ազգանունով մի զինյալ, որը խմբում հավաքագրել է ևս չորս ահաբեկչի։ Հայտնի չէ, թե երբ է վերոնշյալ խումբը ձևավորվել։

ԱԴԾ-ի տվյալներով, զինյալները մի շարք հարձակումներ էին նախապատրաստել գործարարների և քաղաքական գործիչների վրա՝ նպատակ ունենալով գումար և զենք կորզել։

Դատարանի որոշմամբ՝ Բաբաևը և մյուս չորս զինյալները մեղավոր են ճանաչվել և դատապարտվել են 14-ից 19 տարվա ազատազրկման։

Հունվարի 24-ին էլ Անվտանգության դաշնային ծառայության Մոսկվայի բաժինը ձերբակալել էր միջինասիական ծագման 11 ահաբեկիչների, որոնք ժամանել էին Սիրիայից։ Նրանք նույնպես ծրագրել էին մի շարք ահաբեկչություններ իրականացնել մարդաշատ վայրերում։