Հրապարակվել է 2019 թ․ ամենաապահով մեքենաների անունները
Euro NCAP ընկերության մասնագետները կազմել են 2019 թ․ ամենաանվտանգ մեքենաների ցանկը։ «Քրաշ-թեստ» կոչվող փորձարկումների արդյունքները հրապարակել է CarBuyer պորտալը։
«Ոչ մեծ ընտանեկան ավտոմեքենա» կարգում լավագույնն է ճանաչվել Mercedes-Benz A-Class-ը, որը մեծահասակ ուղևորների համար ապահովում է 96%-անոց անվտանգություն ցանկացած վթարի ժամանակ։ Այն ունի նաև արգելակման լրացուցիչ համակարգ, որը վերահսկում է մեքենայի՝ գծերին զուգահեռ գնալը և «զգում է» վարորդի հոգնածությունը։
Այս կարգում երկրորդ և երրորդ տեղերը, համապատասխանաբար, զբաղեցրել են Ford Focus-ը և Nissan Leaf-ը։
«Մեծ ընտանեկան ավտոմեքենա» կարգում առաջին տեղն զբաղեցրել է Audi A6-ը, որն ամենալավ արդյունքն է ցույց տվել ուղևորների անվտանգությունը ստուգող փորձարկման ժամանակ։ Մեքենան հագեցած է նաև վարորդին օգնող նոր տեխնոլոգիաներով։ Այս կարգում Audi A6-ին հաջորդում են Mazda 6-ը և Volvo V60-ը։
Արտաճանապարհայինների դասի մեջ մասնագետներն ամենաապահովն են համարում BMW X5-ը, որն ապահովում է 89%-անոց և 86%-անոց ապահովություն մեծահասակ ուղևորների և մանուկների համար։
Այս դասակարգում երկրորդ և երրորդ տեղերը, համապատասխանաբար, զբաղեցրել են Volkswagen Touareg-ը և Jaguar I-Pace-ը։