Թուրքիայում շարունակվում են զանգվածային ձերբակալությունները

Ստամբուլի դատախազությունը ձերբակալության հրահանգ է արձակել գործող 295 զինծառայողների նկատմամբ, որոնք կասկածվում են Թուրքիայում ահաբեկչական կազմակերպություն համարվող Գյուլենական շարժման հետ առնչություն ունենալու մեջ։ Այս մասին տեղեկացնում է Hurriyet թերթը։

Կասկածյալների բնակության վայրերում և Ստամբուլի այլ թաղամասերում ստուգումներն սկսվել են նախորդ գիշեր։ Հատկանշական է, որ կասկածյալների թվում կան նաև բարձր սպայական կազմի ներկայացուցիչներ՝ երկու գնդապետ, մեկ փոխգնդապետ և ութ մայոր։

Հիշեցնենք, որ Անկարան 2016 թ․ հուլիսի 15-ին տեղի ունեցած հեղաշրջման փորձի կազմակերպման մեջ մեղադրում է արդի իսլամական գաղափարախոսության հիմնադիր Ֆեթուլլահ Գյուլենին, որը 1999 թվականից բնակվում է ԱՄՆ-ում։

Թուրքիայի նախագահ Ռեջեփ Թայիփ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերիկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։  

We use cookies to ensure that we give you the best experience on our website. You may delete and block all cookies from us, but certain parts of the site may not work properly.