Հյուսիսային Կորեան ցանկանում էր պատժամիջոցների վերացում, սակայն ԱՄՆ-ը հրաժարվեց․ Թրամփ
Հյուսիսային Կորեան ցանկանում էր պատժամիջոցների վերացում, սակայն Միացյալ Նահանգները մերժեց։ Այս մասին հայտարարել է ԱՄՆ նախագահ Դոնալդ Թրամփը։
Նրա խոսքով՝ Փհենյանն ինչ-որ բան է առաջարկել Վաշինգտոնին պատժամիջոցների չեղարկման փոխարեն, սակայն դա «չի բավարարել ամերիկյան կողմին»։
Դոնալդ Թրամփը նշել է նաև, որ Կիմ Չեն Ընն իրեն հավաստիացրել է, որ չի պատրաստվում այլևս հրթիռային և միջուկային փորձարկումներ իրականացնել։
ԱՄՆ նախագահը հայտարարել է, որ բանակցությունների արդյունքում ԿԺԴՀ-ի հետ համաձայնագիր չստորագրելը չի եղել իր միանձնյա որոշումը։ Նա հավաստիացրել է, որ համաձայնագրերը պատրաստ են եղել ստորագրման համար, սակայն որոշվել է հրաժարվել դրանից։
«Հյուսիսային Կորեայի իշխանությունների հետ ունեցանք շատ արդյունավետ բանակցություններ։ Չնայած տարակարծություններին՝ գագաթնաժողովն ավարտվել է բարեկամական նոտայի վրա», - նշել է Թրամփը։
Հիշեցնենք, որ Վիետնամի մայրաքաղաք Հանոյում փետրվարի 27-28-ին տեղի է ունեցել ԱՄՆ-ԿԺԴՀ գագաթնաժողովը։ Փետրվարի 27-ին տեղի է ունեցել երկու երկրների առաջնորդների հանդիպում, որը տևել է 2,5 ժամ։ Թրամփը և Կիմ Չեն Ընը քննարկել են Սինգապուրում ձեռք բերված պայմանավորվածությունները։
Այսօր՝ փետրվարի 28-ին, տեղի ունեցած ընդլայնված կազմով հանդիպման ժամանակ Թրամփը հայտարարել է, որ ունեցել են արդյունավետ երկխոսույթուն, և հույս հայտնել, որ Կիմ Չեն Ընի հետ կունենան երկարամյա հաջող համագործակցություն։
Հյուսիսային Կորեայի առաջնորդն, իր հերթին, հայտարարել է, որ պատրաստ է ապամիջուկայնացում կատարել՝ ողջունելով Փհենյանում ամերիկյան կոորդինացիոն բյուրո բացելու առաջարկը։
Նախորդ տարվա հունիսի 12-ին Սինգապուրում տեղի ունեցած հանդիպման ժամանակ Կիմ Չեն Ընը և Դոնալդ Թրամփը պայմանավորվել էին, որ ԿԺԴՀ-ը դադարեցնելու է միջուկային և հրթիռային փորձարկումները երկու երկրների միջև հարաբերությունների կարգավորման դիմաց։