Ամերիկյան ռազմական ինքնաթիռը կրկին դիտորդական թռիչք է իրականացրել Ռուսաստանի տարածքում

Ամերիկյան ռազմական ինքնաթիռը հետախուզական թռիչք է իրականացրել Ռուսաստանի Դաշնության տարածքում՝ համաձայն Բաց երկնքի մասին պայմանագրի։ Այս մասին գրում է Ria Novovsti-ն՝ հղում կատարելով PlaneRadar մոնիթորինգային կենտրոնին։

Նշվում է, որ այսօր՝ մարտի 13-ի առավոտյան՝ Մոսկվայի ժամանակով 06։15-ին, 61-2670 բորտի համարով Boeing OC-135B Open Skies ինքնաթիռը 10,7 կիլոմետր բարձրության վրա թռիչք է իրականացրել Կոմսոմոլսկի շրջանում։

Հատկանշական է, որ Boeing ОС-135Б-ը նախատեսված չէ զենք կրելու համար։ Նախորդ անգամ նույն ինքնաթիռը թռիչք էր իրականացրել ՌԴ տարածքում մարտի 11-ին։ Ամերիկյան հետախուզական ինքնաթիռներին մասնավորապես հետաքրքրում է Հեռավոր Արևելքը։ Ինքնաթիռը նկատվել է Չիտայում։

Մասնագետները կարծում են, որ Վաշինգտոնի ուշադրության կենտրոնում կարող է լինել այս քաղաքում տեղակայված հրթիռային բրիգադը։

Ria Novosti-ն հիշեցնում է, որ թռիչքն իրականացվել է Բաց երկնքի մասին միջազգային պայմանագրի շրջանակներում, որն ստորագրել են ԵԱՀԿ անդամները 1992 թվականին։ Համաձայն այս փաստաթղթի՝ պետությունները կարող են դիտորդական թռիչքներ իրականացնել փաստաթուղթը ստորագրած երկրների տարածքում և տեղեկություններ հավաքել այնտեղի զորքերի վերաբերյալ։