Ամերիկյան ռազմական ինքնաթիռը կրկին դիտորդական թռիչք է իրականացրել Ռուսաստանի տարածքում

Այսօր՝ մարտի 14-ին, ամերիկյան ռազմական ինքնաթիռը կրկին հետախուզական թռիչք է իրականացրել Ռուսաստանի Դաշնության տարածքում՝ համաձայն Բաց երկնքի մասին պայմանագրի։ Այս մասին գրում է Ria Novovsti-ն՝ հղում կատարելով PlaneRadar մոնիթորինգային կենտրոնին։

Այս անգամ 61-2670 բորտի համարով Boeing OC-135B Open Skies ինքնաթիռը Մոսկվայի ժամանակով 06։35-ին նկատվել է Չիտայի օդային տարածքում։

Boeing ОС-135Б-ը նախատեսված չէ զենք կրելու համար։ Նախորդ անգամ նույն ինքնաթիռը թռիչք էր իրականացրել ՌԴ տարածքում երեկ՝ մարտի 13-ին։ Դրանից առաջ՝ մարտի 11-ին, այն կրկին թռիչք էր իրականացրել Չիտայի մոտակայքում։ 

Ամերիկյան հետախուզական ինքնաթիռներին մասնավորապես հետաքրքրում է Հեռավոր Արևելքը։ Մասնագետները կարծում են, որ Վաշինգտոնի ուշադրության կենտրոնում կարող է լինել այս քաղաքում տեղակայված հրթիռային բրիգադը։

Ria Novosti-ն հիշեցնում է, որ թռիչքն իրականացվել է Բաց երկնքի մասին միջազգային պայմանագրի շրջանակներում, որն ստորագրել են ԵԱՀԿ անդամները 1992 թվականին։ Համաձայն այս փաստաթղթի՝ պետությունները կարող են դիտորդական թռիչքներ իրականացնել փաստաթուղթը ստորագրած երկրների տարածքում և տեղեկություններ հավաքել այնտեղի զորքերի վերաբերյալ։

Պայմանագիրը գործում է 2002 թվականից։ Պայմանագրի մեջ են մտնում ՆԱՏՕ-ի անդամ պետությունների մեծ մասը, Ռուսաստանը, Բելառուսը, Վրաստանը, Ուկրաինան, Բոսնիա և Հերցեգովինան, ինչպես նաև Շվեդիան և Ֆինլանդիան։