Մեծ Բրիտանիայի՝ ԵՄ կազմից դուրս գալու համար նախատեսված ժամկետը կարող է երկարաձգվել․ Մերկել

Մեծ Բրիտանիային կարող է տրվել Եվրոպական Միության կազմից դուրս գալու գործընթացի համար կարճաժամկետ երկարաձգում։ Այս մասին հայտարարել է Գերմանիայի կանցլեր Անգելա Մերկելը՝ նշելով, որ այս հարցը քննարկվելու է ԵՄ Խորհրդի նիստի ժամանակ։

«Կարճաժամկետ երկարաձգման մասին կարելի է խոսել դրական երանգներով։ Նման որոշման պատճառ կարող է դառնալ բրիտանական խորհրդարանի դրական քվեարկությունը», - Բունդեսթագում ունեցած ելույթի ժամանակ հայտարարել է Մերկելը։

Խոսելով ԵՄ կազմից Մեծ Բրիտանիայի դուրս գալու գործընթացի մասին՝ Մերկելը նշել է, որ այս հարցի պատշաճ կազմակերպումը բխում է ոչ միայն Մեծ Բրիտանիայի, այլ նաև Գերմանիայի և ԵՄ անդամ մյուս բոլոր 27 պետությունների շահերից։

«Չնայած ԵՄ կազմից դուրս գալու Լոնդոնի ցանկությանը, մենք ապագայում նույնպես շարունակելու ենք սերտորեն համագործակցել մասնավորապես ներքին և արտաքին քաղաքականության հարցերում, ինչպես նաև ՆԱՏՕ-ի և ՄԱԿ-ի կազմում», - ասել է Գերմանիայի կանցլերը։

Հիշեցնենք, որ մարտի 21-22-ին ԵՄ Խորհուրդի նիստի ժամանակ պետք է քննարկվի Brexit-ի հետաձգման հարցը։

Եթե չհաջողվի համաձայնեցնել հետաձգման հարցը, ապա Մեծ Բրիտանիան պետք է պաշտոնապես Եվրոպական Միության կազմից դուրս գա մարտի 29-ին։

We use cookies to ensure that we give you the best experience on our website. You may delete and block all cookies from us, but certain parts of the site may not work properly.