Չինաստանում քիմիական գործարանում տեղի ունեցած պայթյունի հետևանքով զոհերի թիվը հասել է 44-ի

Չինաստանում քիմիական գործարանում տեղի ունեցած պայթյունի հետևանքով զոհվել է 44 մարդ։ Այս մասին տեղեկացնում է Յանչեն քաղաքի քաղաքապետ Ցաո Լուբաոն․ գրում է Ռիա Նովոստի-ն։

Նշվում է նաև, որ 32 մարդ ստացել է մարմնական վնասվածքներ, իսկ 58 հոգի գտնվում է ծայրահեղ ծանր վիճակում։ Ընդհանուր թվով՝ տեղի 16 հիվանդանոցներ է տեղափոխվել 640 մարդ։

Բացի այդ, էվակուացվել է մոտ չորս հազար մարդ, որոնցից երեք հազարը գործարանի աշխատակիցներ են, իսկ մնացածը՝ տեղի բնակիչներ։ Դպրոցները և մանկապարտեզները փակ են։

Ավելի ուշ տեղի իշխանությունները հաղորդեցին, որ խմելու ջրի աղբյուրն աղտոտված չէ։

Չինաստանի արևելքում գտնվող «Ցզյանսու Տյանցզայի» քիմիական գործարանում պայթյունը տեղի էր ունեցել այսօր՝ տեղի ժամանակով 02։00-ի սահմաններում։

Պայթյունն այնքան հզոր է եղել, որ Չինաստանի սեյսմիկ անվտանգության կենտրոնն արձանագրել է 2,2 մագնիտուդ հզորությամբ երկրաշարժ։