Սիրիան խստորեն դատապարտում է Գոլանի բարձունքների վերաբերյալ Թրամփի հայտարարությունը

Սիրիայի արտաքին գործերի նախարարությունը խստորեն դատապարտել է ԱՄՆ նախագահ Դոնալդ Թրամփի հայտարարությունը Գոլանի բարձունքների վերաբերյալ։

Նախօրեին Թրամփը հայտարարել էր, որ Միացյալ Նահանգները պետք է ճանաչի Իսրայելի ամբողջական ինքնիշխանությունը Գոլանի բարձունքների վրա, քանի որ այն «ռազմավարական կարևորություն ունի» Թել Ավիվի համար։

«Սիրիան խստորեն դատապարտում է ԱՄՆ նախագահ Դոնալդ Թրամփի անպատասխանատու հայտարարությունը օկուպացված Գոլանի բարձունքների վերաբերյալ։ Այն կրկին ցույց է տալիս, որ Վաշինգտոնը կուրորեն աջակցում է սիոնիստական ագրեսիվ նկրտումներին», - ասվում է Սիրիայի արտաքին քաղաքական գերատեսչության տարածած հայտարարության մեջ։

Սիրիայի ԱԳՆ-ն նշել է նաև, որ Միացյալ Նահագները խախտում է միջազգային իրավունքը, մասնավորապես՝ ՄԱԿ-ի մի շարք բանաձևեր, այդ թվում՝ Անվտանգության խորհրդի 497-րդ բանաձևը, որն ապօրինի է համարում Գոլանի բարձունքների նկատմամբ Իսրայելի ձգտումները։

1944 թվականից Սիրիային պատկանող Գոլանի բարձունքները Իսրայելի վերահսկողության տակ են անցել 1967 թ․ վեցօրյա պատերազմից հետո։ 1981 թվականին Քնեսեթն ընդունել է «Գոլանի բարձունքների մասին» օրենք, որով ամրագրվել է հրեական պետության ինքնիշխանությունը տվյալ տարածքի վրա։ Հենց այդ ժամանակ էլ Գոլանի բարձունքի բռնակցումն անվավեր է ճանաչվել  ՄԱԿ-ի Անվտանգության Խորհրդի 497 թվակիր բանաձևով։