Ձեր վստահելի աղբյուրը

Ականապատ տարածքներն ականազերծում է  Հայաստանի զինված ուժերի զինծառայողը, որ հանձնի թշնամուն։ Քաղաքագետ Սուրեն Սուրենյանցը սա հոգեբանական առումով շատ ծանր բան է որակում, որը սակայն մեծ ողբերգության՝ միակողմանի ու նվաստացուցիչ զիջումների հետևանք է, դրա ցավոտ բաղադրիչներից մեկը։

«Այլ բան հնարավոր էլ չէր սպասել, քանի որ հանձնող կողմը սովորաբար տարածքը տալիս է կոմֆորտ վիճակում, ցավոք սրտի, սա ցանկացած կապիտուլյացի բնական պայման է։ Մենք կարող ենք սահմանագծման-սահմանազատման մասին երկար խոսել, բայց եթե այն իրականացվեր ամբողջական, ոչ հատվածական, մենք իմանայինք, թե ինչ քարտեզ   է դրված դրա հիմքում, իմանայինք, թե որոնք են դրանց սկզբունքները, բոլոր գործընթացներին ցավոտ չէինք նայի, օրինակ, եթե նույն պարտավորությունը ունենար Ադրբեջանը, եթե մեզ հանձնելիս լիներ Ներքին Հանդի, Ջերմուկի, Սոթք-Խոզնավարի, Սև լճի  կամ այլ հատվածներ»,-Panorama.am-ի հետ զրույցում ասաց քաղաքագետը։

Միակողմանի զիջումների դեմ մեկնարկած պայքարը, նրա խոսքով, եթե շուտով հստակ ձևակերպված քաղաքական օրակարգ ու ասելիք չունեցավ, ինքը դրական զարգացման քիչ հավանականություն կտեսնի։

«Պետք է լինի քաղաքական հստակ ասելիք ու օրակարգ։ Պայքարի մասնակիցներն այսօր ինչ կարող են, անում են, դեռ մի բան էլ ավելի, երախտիքի խոսք իրենց, հատկապես Բագրատ Սրբազանին։ Խոսքս այն մասին է, որ Հայաստանն այսօր կանգնած է մեկ հրամայականի առաջ՝ պետք են քաղաքական լուծումներ, որոնք մեծ հաշվով Նիկոլ Փաշինյանի անցնցում հեռացման մասին են։ Առանց դրա քաղաքական որևէ լուծում չի կարող ռացիոնալ կամ արդյունավետ լինել»,-ասաց նա։

Սուրենյանցի խոսքով, քաղաքական լուծումները պետք է մշակվեն կուսակցությունների ղեկավարների կողմից, որոնք անկախ մարտավարական տարբերություններից՝ պետք է լինեն Նիկոլ Փաշինյանի անցնցում հեռացման մասին։ Եթե դա տեղի չունեցավ, ճգնաժամը խորանալու է։

«Կամ մենք այդ քաղաքական լուծումները կգտնենք, կամ 2-3 ամիս հետո Հայաստանում կլինի անվերահսկելի քաոս, վստահաբար եմ ասում։ Ինչո՞ւ։ Իշխանությունն այլևս չի կարողանում ամբողջովին վերահսկել իրավիճակը, ընդդիմությունն այլևս արդյունավետ լուծումներ չի գտնում իրավիճակը շտկելու համար, հասարակության շրջանում օբյեկտիվորեն նման իրավիճակներում՝ մանավանդ նվաստացուցիչ զիջումների ֆոնին ծնվում են  այպես ասած ավտոնոմ նախաձեռնություններ, որոնք առանց քաղաքական ռացիոնալ ու ճիշտ ուղղորդման կարող են վերածվել քաոսի»,-ասաց նա։

Սուրենյանցն ահազանգում է՝ եթե քաղաքական լուծումներ չառաջարկվեն, չգտնվեն ճգնաժամը խորանալու է բոլոր ոլորտներում։

«Ես ակամայից ինձ բռնացնում եմ մի դաժան մտքի վրա։ Մեր իրականությունը շատ նման  Ժան Ժակ Ռուսոյի նկարագրած նախահեղափոխական Ֆրանսիային, երբ բախվում են երկու տարբեր ֆրանսիաներ, հիմա մենք կանգնած ենք երկու տարբեր հայաստանների բախման վտանգի առաջ։ Ընդհանրապես մենք շատ խոր քաղաքակրթական ճգնաժամի մեջ ենք գտնվում, որ հասարակության սեգմենտները չեն կարողանում կոնսենսուս ձևավորել պետականության  հիմնադրույթների շուրջ, սրանից մեծ ճգնաժամ ուղղակի հնարավոր չի պատկերացնել»,-մանարամասնեց նա։

Քաղաքագետի համոզմամբ, ճգնաժամը հաղթահերելու համար նախ և առաջ պետք է ազատվել այն իշխանություններից, որը  շատ վատն է տարբեր հարթություններում, չկա մի հարթություն, որը քննարկելու դեպքում կարելի է խոսել իշխանության դրական հետքի, հաջողելու մասին։

«Չկա նման հարթություն։ Ու քանի որ իշխանության մոտ հիմա միացրած է միայն ինքնապահպանման ռեժիմը, որն ի հաշիվ Հայաստանի է, դա բերելու է կոլապսի, եթե լուծումներ չգտնենք»,-ընդգծեց նա։