Ադրբեջանում անցկացվել է սահմանադրական փոփոխությունների հանրաքվե

 Այս տարվա սեպտեմբերի 26-ին Ադրբեջանում անցկացվել է սահմանադրական փոփոխությունների հանրաքվե, հայտնում է  ռուսական РИА Новости լրատվական գործակալությունը՝ հղում անելով ադրբեջանական ԶԼՄ-ներին։

 Ադրբեջանի ԿԸՀ-ի (Կենտրոնական ընտրական հանձնաժողով) տվյալներով՝ քվեարկությունն անցկացվել է 125 ընտրատարածքների 5627 ընտրական տեղամասերում, որոնք աշխատել են տեղի ժամանակով 08:00-ից մինչև 19:00-ն։ Ընտրություններին մասնակցելու իրավունք է ունեցել Ադրբեջանի ավելի քան 5,6 միլիոն քաղաքացի։

 Ադրբեջանի Հանրապետության անկախության օրոք սա երրորդ հանրաքվեն էր, որ անցկացվել է սահմանադրությունը փոփոխելու համար։ Այս անգամ սահմանադրական փոփոխությունը նախատեսում էր երկրի հիմնական օրենքի 29 հոդվածների փոփոխություն։ Դրանցից ամենակերևորը, թերևս, նախագահի պաշտոնավարման ժամկետը նախկին 5-ից 7 տարի դարձնելն էր և նախագահի թեկնածուների տարիքային սահմանափակման վերացումը։ Նախատեսվում էր նաև երկրի փոխնախագահի պաշտոնի ստեղծում և պատգամավոր դառնալու համար նախատեսված տարիքային շեմի իջեցում (նախկին 25-ի փոխարեն այժմ արդեն 18 տարեկան)։ 

  Համաձայն Ադրբեջանի ընտրական օրենսգրքի՝ հանրաքվեն վավեր է համարվում, եթե ընտրություններին մասնակցում է ընտրելու իրավունք ունեցողների ամենաքիչը 25%-ը։ Սահմանադրական փոփոխությունները համարվում են ընդունված, եթե փոփոխություններին կողմ է քվեարկում ընտրողների կեսից ավելին։ 

 Սահմանադրական փոփոխությունների վերաբերյալ հանրաքվեի վերջնական արդյունքները կհայտարարվի հոկտեմբերի 21-ին։

 Հիշեցնենք, որ Ադրբեջանի սահմանադրությունն ընդունվել է 1995թ-ի նոյեմբերի 12-ին։ Այն փոփոխությունների է ենթարկվել երկու անգամ՝ 2002 թվականի օգոստոսի 24-ին և 2009 թվականի մարտի 18-ին՝ հանրաքվեների միջոցով։

Photo: Reuters