Անկարայում զինված հարձակում է տեղի ունեցել Ռուսաստանի դեսպանի վրա

Դեկտեմբերի 19-ին զինված հարձակում է տեղի ունեցել Թուրքիայում Ռուսաստանի արտակարգ և լիազոր դեսպան Անդրեյ Կարլովի վրա, հաղորդում է «Հյուրիյեթ» լրատվականը։

Դեպքը տեղի է ունեցել ժամանակակից արվեստի կենտրոնում կայացած բաց ցուցահանդեսի ժամանակ։ Անհայտ անձը դեսպանի ելույթի ժամանակ օդ է կրակել, ապա մեջքից հրազենային վնասվածք հասցրել դեսպանին։ «Հյուրիյեթ» պարբերականի թղթակցի խոսքով՝ կրակոցներից անմիջապես հետո սրահը դադարկվել է, և դեսպանի ուղղությամբ արձակվել է ևս մեկ կրակոց։

Աղբյուրը նշում է, որ անձը ներս է մտել՝ ներկայանալով որպես ոստիկան։ Նա կանգնել է դեսպանի անմիջապես հետևում։ Կրակոցներ արձակելուց հետո նա Հալեպի վերաբերյալ ինչ-որ բաներ է ասել, ապա կրկին կրակել դեսպանի վրա։ Ոստիկանությունն անմիջապես արձագանքել է։ Ականատեսների վկայությամբ՝ լսվել է 15-20 կրակոց։ Հարձակում կատարած անձը սպանվել է ոստիկանության կողմից արձակված կրակոցներից։

Տեղի ունեցածի վերաբերյալ Ռուսաստանի դեսպանատունը դեռ հայտարարություն չի արել։ Ռուսաստանի Դաշնության նախագահի մամուլի խոսնակ Դմիտրի Պեսկովը հայտարարել է, որ Վլադիմիր Պուտինը տեղեկացված է հարձակման մասին և նախատեսում է հանդիպել հատուկ ծառայությունների ղեկավարին և արտաքին գործերի նախարարին։