Լուգանսկում տեղի ունեցած մեքենայի պայթյունից ԵԱՀԿ դիտորդ է զոհվել
Լուգանսկի ժողովրդական Հանրապետության (ԼԺՀ) Սլավյանոսերբական շրջանի Պրիշիբ գյուղի մոտակայքում տեղի ունեցած մեքենայի պայթյունից զոհվել է ԵԱՀԿ Հատուկ դիտորդական առաքելության աշխատակից: Այս մասին Луганскинфоцентр գործակալությանը հայտնել են ԼԺՀ-ի ոստիկանության մամլո ծառայությունում:
ԼԺՀ-ի Ազգային անվտանգության նախարարության հրապարակած տվյալների համաձայն՝ պայթյունի արդյունքում երեք մարդ տարբեր աստիճանի վնասվածքներ է ստացել:
Նախարարության նախնական տվյալներով՝ պայթյունն իրականացվել է ուկրաինական դիվերսիոն-հետախուզական խմբի կողմից:
Դիտորդի մահվան մասին լուրը հաստատել է նաև Ավստրայի արտգործնախարար, ԵԱՀԿ գործող նախագահ Սեբաստիան Կուրցը:
«Ողբերգական լուրեր Ուկրաինայից. Հատուկ դիտորդական առաքելության ավտոմեքենան պայթել է ականի վրա, որի արդյունքում աշխատակիցներից մեկը զոհվել է, մյուսը վիրավոր է: Դեպքի առիթով ես զրուցել եմ առաքելության նախագահ Էրթուղրուլ Ապականի հետ: Մենք անհրաժեշտ ենք համարում հանգամանորեն հետաքննել կատարվածը. մեղավորները պետք է պատժվեն»,- իր թվիթերյան էջում գրել է Կուրցը:
ՏԱՍՍ գործակալության տվյալներով՝ զոհված աշխատակիցը բուժաշխատող էր:
ԼԺՀ-ի ոստիկանությունը նշել է, որ ԵԱՀԿ առաքելության անձնակազմը շեղվել էր իր երթուղուց, որն էլ հավանաբար դարձել է պայթյունի պատճառ: