Վենեսուելայում զինված խմբերը հարձակում են գործել ընդդիմության վրա

Հունիսի 30-ին մի քանի զինված խմբեր հարձակում են գործել Վենեսուելայի հյուսիս-արևելյան Լարա նահանգի Բարկիսիմետո քաղաքի հիվանդանոցի և «Դեմոկրատական միասնության դաշինք» ընդդիմադիր կոալիցիայի ներկայացուցիչների վրա. այս մասին տեղեկացրել է El National թերթի կայքը: Հաղորդված տվյալների համաձայն՝ այդ մարդիկ իշխանամետ աշխարհազորային խմբերի անդամներ են՝ առավել հայտնի որպես «կոլեկտիվոս»:

Սոցիալական կայքերում հրապարակված կադրերում երևում է, որ խմբավորման անդամները ծածկում են դեմքերը և քաղաքում շրջում են առանց համարանիշների ամենագնացներով: Որոշ տվյալների համաձայն՝ բացի ինքնաձիգներից նրանք նաև զրահաբաճկոններ ունեն. ոստիկանությունը չի խոչընդոտում նրանց գործողություններին:

Պատգամավոր Ալֆոնսո Մարկինան տեղեկացրել է, որ ուրբաթ՝ հունիսի 30-ին, Բարկիսիմետոյում երկու մարդ է սպանվել: Սակայն դեռևս հայտնի չէ՝ արդյոք «կոլեկտիվոս»-ը կապ ունեն նրանց մահվան հետ: Ազգային ժողովի անդամներից մեկը նշել է, որ կատարվածի համար պատասխանատու են իշխանությունները:

Հիշեցնենք, որ ապրիլի սկզբից Վենեսուելայում ընդդիմության կողմից խոշոր բողոքի ցույցեր են անցկացվում: Դրանց համար առիթ հանդիսացան Գերագույն դատարանի՝ նախագահ Նիկոլաս Մադուրոյի լիազորություններն ընդլայնող և խորհրդարանի գործառույթները սահմանափակող որոշումը:

Այս ընթացքում մոտ 80 մարդ է զոհվել, տուժել են 1400-ից ավելին, որոնցից 300-ը՝ իրավապահ մարմիններ և Ազգային գվարդիայի աշխատակիցներ. ձերբակալվել է 3200-ից ավել մարդ: