Զինյալները հարձակվել են Ֆիլիպինների նախագահի պահակախմբի վրա

Ֆիլիպինների հարավում մաոիստ գրոհայինները (Մաո Ցզեդունի կոմունիստական հայացքների հետևորդները) հարձակում են գործել նախագահական պահակախմբի վրա, ինչի արդյունքում տարբեր աստիճանի վնասվածքներ է ստացել հինգ թիկնապահ. այս մասին տեղեկացնում է CNN-ը:

Հեռուստաալիքի տվյալներով՝ դեպքը պատահել է այսօր՝ հուլիսի 19-ի առավոտյան, Մինդանաո կղզու կենտրոնական Կոտաբատո կենտրոնական շրջանում: Հայտնի է դաձել, որ անցակետերից մեկում զինվորական համազգեստով ծպտված 50 գրոհայիններ կրակ են բացել թիկնապահների երկու ավտոմեքենաների վրա:

«Երբ մեր երկրորդ մեքենան նկատեց, որ նրանք իսկական զինվորներ չեն, մեր զինվորականները կրակ բացեցին նրանց ուղղությամբ»,- հայտնել է նախագահի պահակախմբի ներկայացուցիչ գնդապետ Մայք Ակինոն: Տուժածներից երկուսը տեղափոխվել են հիվանդանոց: Նա հավելել է, որ կառավարական ուժերը հետապնդում են զինյալներին:

ԶԼՄ-ների փոխանցմամբ՝ հարձակման պահին երկրի նախագահ Ռոդրիգո Դուտերտեն այդ շրջանում չի եղել:

Ավելի վաղ հայտնի էր դարձել, որ Ֆիլիպինների նախագահը դիմել է խոհրդարանին՝ խնդելով երկարացնել երկրի հարավում հաստատված ռազմական դրությունը մինչև տարվա վերջ:

Ինչպես նշում է Ռիա Նովոստի-ն, մայիսին՝ բանակի և Իսլամական պետության կողմնակիցների բախումներից հետո, Դուտերտեն ռազմական դրություն է հաստատել հարավային Մինդանաո շրջանում: Գրոհայինների ռազմական գործողությունների հիմնական կենտրոնը մնում է Մարավի քաղաքը, որի գրավմանը մասնակցել է մոտ 500 զինյալ: