Անհայտ անձը հարձակում է գործել Համբուրգի խանութներից մեկի հաճախորդների վրա

Զինված տղամարդը հարձակում է գործել Համբուրգի սուպերմարկետներից մեկի հաճախորդների վրա՝ սպանելով մեկ և վիրավորելով մի քանի մարդու. քաղաքային ոստիկանության փոխանցմամբ՝ հանցագործը ձերբակալված է:

Ինչպես տեղեկացնում է ՏԱՍՍ-ը, միջադեպը տեղի է ունեցել քաղաքի հյուսիս-արևելքում՝ Բարմբեք թաղամասում:

Bild թերթի տվյալներով՝ քաղաքում հայտարարվել է ահաբեկչական սպառնալիքի մասին: Սուպերմարկետի տնօրենը հայտնել է, որ տղամարդը «սկսել է հանկարծակի հարձակվել բոլորի վրա»: Ներկա պահին դեպքի վայրին հարակից բոլոր փողոցները շրջափակված են ոստիկանության կողմից:

Իրավապահների տեղեկություններով՝ ձերբակալվածը գործել է առանց համախոհների: Այսպիսով, չի հաստատվել այն տեղեկությունը, թե քաղաքում կարող է ևս մեկ կասկածյալ թաքնվել:

Այդուհանդերձ, ոստիկանությունը մինչև այժմ չի կարողացել պարզել նրա արարքի իրական դրդապատճառները: Նախնական տվյալների համաձայն՝ տղամարդը կողոպտիչ է եղել, սակայն դա դեռևս չի հաստատվել: Տեղեկություններ չկան նաև այն մասին, որ պատահածը կապված է ահաբեկչության հետ: