Արագածոտնի մարզի Շամիրամ գյուղում անհայտ անձը կրակ է բացել սգո սրահում հավաքվածների ուղղությամբ. կա 4 զոհ, 9 վիրավոր

Այսօր՝ օգոստոսի 1-ին՝ ժամը 10.40-ին, Արագածոտնի մարզի Շամիրիամ գյուղում ողբերգական դեպք է տեղի ունեցել. «Սայգա» տեսակի որսորդական հրացանով զինված անձը մտել է գյուղի գերեզմանոցի հարևանությամբ գտնվող սգո սրահ և կրակ բացել այնտեղ հավաքվածների ուղղությամբ: Ֆոտոլրագրող Գագիկ Շամշյանի փոխանցմամբ՝ կրակոցների հետևանքով զոհվել է չորս, վիրավորվել՝ ինը մարդ:

Դեպքի վայր են ժամանել Արագածոտնի մարզի ոստիկանության օպերատիվ խումբը, մարզի ոստիկանապետ Ռոման Կիրակոսյանը, ինչպես նաև մազային քննչական վարչության քննիչներ՝ Հայաստանի քննչական պետի գլխավորությամբ:

Հանցագործության վտանգավորության բարձր աստիճանի պատճառով՝ դեպքի վայր են ժամանել նաև Արագածոտնի մարզի դատախազները, ինչպես նաև ՀՀ ոստիկանապետի տեղակալ գեներալ-մայոր Սամվել Հովհաննիսյանը:

Շամիրամի գյուղապետ Մրազ Բրոյանի փոխանցմամբ՝ կրակոցների հետևանքով զոհվել են 1984 թվականին ծնված Զորիկ Օզմանյանը, նրա 81-ամյա հորեղբայրը՝ Ամրո Օզմանյանը, և 1969 թվականին ծնված Աղասի Քալոյանը:

Ականատեսները հայտնել են, որ հրացանի պարունակությունը դատարկելուց հետո անհայտ անձը «Նիվա» մակնիշի մեքենայով փախուստի է դիմել, սակայն ճանապարհին վթարի է ենթարվել և մեքենան թողնելով դեպքի վայրում՝ ոտքով փախել:

Մեքենայի մոտակայքում հայտնաբերվել է «97 SZ 777» պետհամարանիշ, իսկ մեքենայում 50-ամյա Թ.Ք.-ի վարորդական իրավունքը և զենքի թույլտվության վկայական:

Նախնական վարկածի համաձայն՝ հանցագործությունն իրականացվել է կեցաղային վեճի պատճառով: Ձեռնարկվում են միջոցառումներ կասկածյալին հայտնաբերելու ուղղությամբ. հետաքննությունը շարունակվում է: