Պուտինը չի մասնակցի ՄԱԿ-ի Գլխավոր ասամբլեայի այս տարվա նստաշրջանին

Ռուսաստանի Դաշնության նախագահ Վլադիմիր Պուտինը չի մասնակցի ՄԱԿ-ի Գլխավոր ասամբլեայի այս տարվա նստաշրջանին, որը մեկնարկելու է սեպտեմբերին։ Այս մասին հայտնում է ՌԴ նախագահի մամուլի խոսնակ Դմիտրի Պեսկովը։

«Նախագահի ծրագրերում դա չկա», - ասել է Պեսկովը՝ չմեկնաբանելով Թրամփի՝ ՄԱԿ-ի Գլխավոր ասամբլեայի նստաշրջանի նախօրեին համաշխարհային առաջնորդների ժողով անցկացնելու նախաձեռնությունը։

«Ռոյթերս» գործակալության փոխանցմամբ՝ ԱՄՆ-ի նախագահը պատրաստվում է համաշխարհային առաջնորդների ժողովի ընթացքում քննարկել ՄԱԿ-ում փոփոխություններ մտցնելու հարցը։ Նշվում է, որ պետությունների առաջնորդները կհրավիրվեն հանդիպմանը, եթե ստորագրեն տասը կետից կազմված հռչակագիրը, որում կոչ է արվում ՄԱԿ-ի գլխավոր քարտուղար Անտոնիու Գուտերեշին «սկսել միջազգային կազմակերպության արդյունավետ և նպատակաուղղված բարեփոխումը»:

ՄԱԿ-ի Գլխավոր ասամբլեայի 72-րդ նստաշրջանը կմեկնարկի սեպտեմբերի 19-ին և կտևի մինչև նույն ամսվա 25-ը։ ՄԱԿ-ի ամբիոնից առաջին անգամ ելույթով հանդես կգա ԱՄՆ նախագահ Դոնալդ Թրամփը։

Նախնական ծրագրի համաձայն՝ ՌԴ արտաքին գործերի նախարար Սերգեյ Լավրովը ելույթ կունենա սեպտեմբերի 21-ին։