Եվրամիությունը ռիսկի է դիմում վերածվել դատարկ շրջանակի․ Կատալոնիայի ղեկավար

Եվրամիությունը ռիսկի է դիմում վերածվել «դատարկ շրջանակի», եթե շարունակի աչք փակել Կատալոնիայի խնդրի վրա։ Այս մասին հատարարել է ինքնավարության ղեկավար Կարլոս Պուչդեմոնը՝ նշելով, որ Իսպանիայի իշխանությունները Կատալոնիայի հարցում բացահայտ կերպով խախտում են մարդու իրավունքների վերաբերալ եվրոպական կանոնադրությունը։

«Մեր տունը Եվրոպան է։ Սակայն նա իրեն շատ վատ է զգում և ռիսկի է դիմում վերածվել  դատարկ շրջանակի», - Պուչդեմոնի խոսքերը մեջբերում է Կատալոնիայի կառավարության մամուլի ծառայությունը։

Նրա խոսքով՝ Եվրոպայի այս պահվածքը թույլ է տալիս խախտել մարդու իրավունքները Կատալոնիայում։ «Սա հատկապես ակնառու է, երբ ԵՄ անդամ պետությունը բացահայտորեն ոտնահարում է այս կանոնադրությունը, իսկ Եվրամիությունը չի կարողանում ձայնը բարձրացնել», - շարունակել է Կատալոնիայի ղեկավարը։

Ավելի վաղ հայտնի էր դարձել, որ Պուչդեմոնը կարող է մեկնել Մադրիդ մասնակցելու խարհրդարանի վերին պալատի (Սենատ) լսումներին՝ այնտեղ ներկայացնելով Բարսելոնայի դիրքորոշումը։ Իսպանիայի կառավարությունը նախկինում բազմիցս առաջարկել է Պուչդեմոնին հանդես գալ խոհրդարանի ստորին պալատում, սակայն Կատալոնիայի ղեկավարը մերժել է այդ առաջարկները։

Օրեր առաջ Իսպանիայի վարչապետ Մարիանո Ռախոյը հայտարարել էր, որ պատմության մեջ առաջին անգամ կիրառում է սահմանադրության 155-րդ հոդվածը։ Սա նշանակում է, որ Մադրիդը զբաղեցրած պաշտոնից ազատ է արձակում Կատալոնիայի ողջ կառավարությանը։ Բացի դրանից, Իսպանիայի իշխանությունները ցանկանում են առաջիկա կես տարվա ընթացքում նոր ընտրություններ անցկացնել Կատալոնիայում։ Իսպանիայի Սենատը պետք է հաստատի կառավարության որոշումը հոկտեմբերի 27-ին։

Հիշեցնենք, որ հոկտեմբերի 1-ին Կատալոնիայում անցկացվել է անկախության հանրաքվե, որը չի ընդունում պաշտոնական Մադրիդը։ Ընտրելու իրավունք ունեցող 5,3 միլիոն քաղաքացիներից հանրաքվեին մասնակցել է 2,2 միլիոնը, որի ավելի քան 90%-ը կողմ է քվեարկել անկախությանը։