Վստահ եմ, որ ԵՄ անդամ երկրների մեծ մասը Երուսաղեմը ճանաչելու է որպես Իսրայելի մայրաքաղաք․ Նեթանյահու

Իսրայելի վարչապետ Բենիամին Նեթանյահուն վստահ է, որ Եվրամիության անդամ բոլոր երկրները կամ դրանց մեծ մասը Երուսաղեմը ճանաչելու են որպես Իսրայելի մայրաքաղաք և այնտեղ են տեղափոխելու իրենց դեսպանատները։ Այս մասին Նեթանյահուն հայտարարել է ԵՄ անդամ երկրների արտգործնախարարների հետ հանդիպումից առաջ։

«Ժամանակն է եկել, որ պաղեստինցիները ճանաչեն հրեական պետությունը, ինչպես նաև ընդունեն այն փաստը, որ այդ պետությունն ունի մայրաքաղաք, և դա Երուսաղեմն է», - ասել է Նեթանյահուն։

«Հավատում եմ, որ ԵՄ անդամ բոլոր պետությունները կամ գոնե դրանց մեծ մասը շուտով իրենց դեսպանատները կտեղափոխեն Երուսաղեմ՝ այն ճանաչելով Իսրայելի մայրաքաղաք, և կսկսեն մեզ հետ աշխատել անվտանգության և խաղաղության պայմաներում», - հավելել է Իսրայելի վարչապետը։

Հիշեցնենք, որ ԱՄՆ նախագահ Դոնալդ Թրամփն օրեր առաջ հայտարարել է, որ Երուսաղեմը ճանաչում է որպես Իսրայելի մայրաքաղաք, ինչպես նաև ցանկություն է հայտնել Թել Ավիվից այստեղ տեղափոխել ամերիկյան դեսպանատունը։

1995 թ․ ԱՄՆ Կոնգրեսն ընդունել է օրենք, որով Իսրայելում ԱՄՆ դեսպանատունը պետք է Թել Ավիվից տեղափոխվի Երուսաղեմ։ Քաղաքի վիճելի կարգավիճակի պատճառով ԱՄՆ-ի բոլոր նախագահներն ամեն վեց ամիսը մեկ ստորագրում էին փաստաթուղթ վերոնշյալ օրենքի կատարումը հետաձգելու մասին։

Թրամփի այս որոշումը դժգոհության մեծ ալիք է բարձրացրել Մերձավոր Արևելքի մի շարք երկրներում, հատկապես՝ Պաղեստինում։ Բողոքի ցույցեր են սկսվել հենց Երուսաղեմում, որտեղ բախումների հետևանքով արդեն հարյուրավոր մարդիկ են տուժել։

Իսրայելը Երուսաղեմն արևելյան թաղամասերով հանդերձ համարում է իր «միակ և անբաժան մայրաքաղաքը», որը գրավվել է 1967 թ․ Վեցօրյա պատերազմի (հայտնի նաև որպես Երրորդ արաբաիսրայելական պատերազմ անվանումով, - խմբ․) ընթացքում։

Երուսաղեմի կարգավիճակի հարցը մերձավորարևելյան այս հակամարտության կարևորագույն կողմն է, որը պետք է կարգավորվի պաղեստինցիների հետ բանակցությունների հիման վրա։