Ռուսաստանը չի սպառնում ՆԱՏՕ-ի անդամներից ոչ մեկին․ Սթոլթենբերգ
ՆԱՏՕ-ի գլխավոր քարտուղար Յենս Սթոլթենբերգը կարծում է, որ Ռուսաստանը չի սպառնում Դաշինքի անդամ պետություններից ոչ մեկին։ Ինչպես գրում է Lenta-ն, Սթոլթենբերգն այս մասին խոսել է Foreign Policy-ին տված հարցազրույցի ընթացքում։
Նրա խոսքով՝ եթե Ղրիմի և Ուկրաինայի դեպքերը կրկին տեղի ունենային, ապա Դաշինքի կողմից անպայման պատասխան կհետևեր։ Սթոլթենբերգը վստահեցրել է, որ այս պահին ՆԱՏՕ-ն իրականացնում է հավաքական պաշտպանության՝ Սառը պատերազմի ժամանակներից սկսած ամենախոշոր ամրացումները։ Նա նշել է, որ այս արձագանքը հաջորդել է «Ռուսաստանի ագրեսիվ գործողություններին»։
Փետրվարի 19-ին ՆԱՏՕ-ի գլխավոր քարտուղարը հայտարարել էր, որ Ռուսաստանը խախտում է միջին և փոքր հեռահարության հրթիռների ոչնչացման մասին համաձայնագիրը՝ այդպիսով «սանձազերծելով նոր միջուկային մրցավազք»։
Սթոլթենբերգի խոսքով՝ Ռուսաստանում միջուկային զենքերի արդիականացումը կարող է եվրոպական մյուս պետություններին ստիպել զարգացնել իրենց միջուկային ծրագրերը։
Հատկանշական է, որ այս հայտարարությունից մոտ մեկ շաբաթ առաջ ԱՄՆ նախագահ Դոնալդ Թրամփը հատարարել էր, որ ամերիկյան միջուկային սպառազինությունը միշտ էլ լինելու է աշխարհում ամենամեծը։
ԱՄՆ-ը փետրվարի 3-ին հրապարակել էր միջուկային դոկտրինը, որտեղ նշված էր, որ Ռուսաստանը կարող է առաջինը միջուկային հարված հասցնել իր հակառակորդներին։
Միջին և փոքր հեռահարության հրթիռների մասին համաձայնագիրը կնքվել է ԱՄՆ-ի և Ռուսաստանի միջև 1987 թ․։ Համաձայնագրը թույլ չի տալիս կողմերին ունենալ ցամաքային տեղակայման, ինչպես նաև թևավոր հրթիռներ գործողության՝ 500-ից մինչև 5500 կիլոմետր շառավիղով։ Մոսկվան և Վաշինգտոնը հաճախ մեղադրում են միմյանց համաձայնագրի դրույթները խախտելու մեջ։