Եգիպտոսի գործող նախագահն ընտրություններին հավաքել է 97% ձայն

Եգիպտոսի գործող նախագահ Աբդել Ֆաթթահ Ալ Սիսին հաղթել է մարտի 26-ից 28-ը անցկացված նախագահական ընտրություններում՝ հավաքելով 97% ձայն։ Այս մասին հայտնել է Եգիպտոսի կենտրոնական ընտրական հանձնաժողովի ղեկավարը․ գրում է ՏԱՍՍ-ը։

ԿԸՀ-ի տվյալներով՝ Ալ Սիսիի օգտին քվեարկել է 21,835,387 մարդ, ինչը կազմում է ընտրությանը մասնակցած քաղաքացիների 97.08%-ը։ Քվեարկությանը մասնակցել է 24,254,152 մարդ, ինչը ընտրելու իրավունք ունեցողների ընդամենը 41.05%-ն է։ Եգիպտոսում ընտրելու իրավունք ունի 57,078,138 մարդ։

Ալ Սիսիի միակ հակառակորդը «Ալ Գադ» կուսակցության առաջնորդ Մուսա Մուսթաֆա Մուսան էր, որի օգտին քվեարկել է ընտրողների 2.92%-ը կամ 656,500 մարդ։

Անվավեր է ճանաչվել 1,76 միլիոն քվեաթերթիկ կամ ընդհանուր թվի 7,27%-ը։

Եգիպտոսի կենտրոնական ընտրական հանձնաժողովի համոզմամբ՝ կոպիտ ընտրախախտումներ չեն գրանցվել, բացի այն դեպքերից, երբ ժամանակից շուտ են բացվել մի քանի ընտրատեղամասեր։

Համաձայն Եգիպտոսի սահմանադրության՝ գործող նախագահի պաշտոնավարման ժամկետն ավարտվում է հունիսի 2-ին։ Սա նշանակում է, որ երկրորդ անգամ ընտրված Ալ Սիսիի երդմնակալության արարողությունը պետք է տեղի ունենա մինչև այդ ժամկետը։