Չեխիայի նախագահը խոստովանել է, որ իր երկիրն առնչություն է ունեցել «Новичок» կոչվող թունավոր նյութի պատրաստման գործին

«Новичок» կոչվող նյարդապարալիտիկ նյութը, որով ենթադրաբար թունավորել են ՌԴ հետախուզության նախկին գնդապետ Սերգեյ Սկրիպալին և նրա դստերը՝ Յուլիային, պատրաստվել և պահեստավորվել է Չեխիայում։

Այս մասին հայտարարել է Չեխիայի նախագահ Միշոլ Զեմանը․ գրում է Lenta-ն՝ հղում կատարելով չեխական Irozhlas պարբերականին։

«Քանի որ Անվտանգության ծառայության (քաղաքացիական հակահետախուզություն) տեղեկատվությունը գաղտնի չէ, ես կարող եմ պատմել այն։ 2017 թ․ նոյեմբերին պաշտպանության նախարարության՝ Բռնո քաղաքում գտնվող գիտահետազոտական ինստիտուտում փորձարկվել է նյարդապարալիտիկ թույնը, որը դասակարգվել է որպես A230։ Թույնը պատրաստվել է բավական քիչ քանակությամբ, որից հետո այն ոչնչացվել է», - ասել է Զեմանը։

Նրա խոսքով՝ Չեխիայի՝ միջուկային անվտանգության պետական վարչությունը և ռազմապատմական ինստիտուտը հաստատել են, որ վերոնշյալ նյութը եղել է ոչ թե A230 դասի, այլ ուրիշ ինչ-որ բան։

«Ես փաստաթուղթ եմ ստացել նաև ռազմական հետախուզությունից, որում հստակորեն ասվում է, որ այդ A230-ը հենց «Новичок»-ն է։ Քանի որ ռազմական հետախուզությունն ավելի մոտ է այս թեմային, քան քաղաքացիական հակահետախուզությունը, ես նման եզրահանգում կատարեցի։ Մենք քիչ քանակությամբ արտադրել և փորձարկել ենք «Новичок» կոչվող նյութը, որից հետո այն ոչնչացվել է։ Գիտենք՝ երբ և որտեղ», - պատմել է Չեխիայի նախագահը՝ հավելելով, որ ռազմական հետախուզությամբ պնդմամբ՝ A230-ը «Новичок»-ը չէ։ Այն իրականում A234-ն է։

Lenta-ն հիշեցնում է, որ ապրիլի 12-ին Քիմիական զենքն արգելող կազմակերպությունը հաստատել էր, որ Սերգեյ Սկրիպալը թունավորվել է նյարդապարալիտիկ նյութի օգնությամբ։ Կազմակերպության զեկույցում, սակայն, չի հիշատակվում «Новичок» անվանումը։

Ապրիլի 14-ին ՌԴ արտաքին գործերի նախարար Սերգեյ Լավրովը, հղում կատարելով շվեյցարական լաբորատորիայի կատարած հետազոտություններին, հայտարարել էր, որ Սկրիպալների թունավորման համար օգտագործվել է BZ կոչվող նյութը, որն արտադրվել է ԱՄՆ-ում և ՆԱՏՕ-ի անդամ այլ երկրներում։

Այս տարվա մարտի 4-ին ՌԴ հետախուզության գլխավոր վարչության նախկին գնդապետ Սերգեյ Սկրիպալը (նրան Ռուսաստանում մեղադրում են Մեծ Բրիտանիայի օգտին լրտեսություն կատարելու մեջ, -խմբ․) և նրա դուստրն անգիտակից վիճակում հայտնաբերվել են Սոլսբերի քաղաքի կենտրոնում գտնվող այգիներից մեկի նստարանին։ Նրանք տեղափոխվել են հիվանդանոց․ բժիշկները նրանց վիճակը գնահատում են կայուն ծանր։

Բրիտանական կողմը տեղի ունեցածի մեջ մեղադրում է Ռուսաստանին։ Մոսկվան կտրականապես հերքում է մեղադրանքները և պահանջում՝ ապացույցներ ներկայացնել։

Ավելի ուշ բրիտանացի մասնագետները հայտարարեցին, որ կիրառվել է «Новичок» կոչվող թունավոր նյութը։

Ի աջակցություն Մեծ Բրիտանիայի իշխանությունների՝ Լոնդոնի դաշնակից մի շարք պետություններ իրենց երկրներից արտաքսեցին բազմաթիվ ռուս դիվանագետների։ Մոսկվան հայելային պատասխան տվեց բոլոր այս պետություններին։

We use cookies to ensure that we give you the best experience on our website. You may delete and block all cookies from us, but certain parts of the site may not work properly.