Էրդողանը հայտարարել է նախագահական ընտրություններում իր հաղթանակի մասին
Թուրքիայի նախագահ Ռեջեփ Թայիփ Էրդողանը հայտարարել է, որ այսօր կայացած նախագահական և խորհրդարանական ընտրությունների արդյունքում ժողովուրդն իրեն է վստահել երկրի ղեկավարի պաշտոնը։
«Մեր ժողովուրդն մեզ է վստահել նախագահի պարտավորությունների կատարումը», - Ստամբուլում ունեցած ելույթի ժամանակ հայտարարել է Էրդողանը։
Նա նաև ընդգծել է ընտրություններին մասնակցության բարձր ցուցանիշը (շուրջ 90%)։ Նրա խոսքով՝ հենց սա է ժողովրդավարության ցուցիչը։
«Շնորհակալ եմ քվեարկած բոլոր քաղաքացիներին։ Մասնակցության 90%-ը ռեկորդ է․ սա բոլորի համար ժողովրդավարության դաս է։ Ժողովուրդն իր կամքն արտահայտեց։ Նախընտրական շրջանում եղած ամբողջ լարվածությունը պետք է թողնել անցյալում և վճռականորեն շարժվել առաջ։ Հույս ունեմ՝ ոչ ոք իր պարտությունն արդարացնելու համար չի փորձի ստվեր գցել մեր ընտրական համակարգի վրա», - ասել է Էրդողանը։
Նշենք, որ նախագահական ընտրությունների քվեաթերթիկների 95%-ի հաշվարկից հետո առաջատարն Էրդողանն է 53%-ով։ Նրա հիմնական մրցակից Մուհարրեմ Ինջեն ստացել է 31% ձայն։