Մոսկվան պատասխան քայլեր է մշակում ԱՄՆ-ի նոր պատժամիջոցների դեմ․ Զախարովա

Ռուսաստանն զբաղվում է ամերիկյան նոր պատժամիջոցների դեմ պատասխան քայլերի մշակմամբ։ Այս մասին լրագրողների հետ ճեպազրույցի ընթացքում հայտարարել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան։

«Այս անգամ որպես մտացածին պատրվակ ընտրվել է Սոլսբերիում Սկրիպալների հետ տեղի ունեցած թունավորման դեպքը։ Ռուսական կողմը բազմիցս զգուշացրել է, որ Մոսկվայի հետ վերջնագրերով և ուժի դիրքերից խոսելը անօգուտ է և անհեռանկարային։ Ռուսաստանը պատասխան քայլեր է մշակում Վաշինգտոնի հերթական պատժամիջոցներին», - ասել է Զախարովան։

Նրա խոսքով՝ Մոսկվայի պատասխանը լինելու է ամերիկյան պատժամիջոցների մասշտաբներին համարժեք։ «Ինչպիսին հակառուսական պատժամիջոցներն էլ, այնպիսին էլ կլինեն մեր պատասխան քայլերը», - ընդգծել է մամուլի խոսնակը։

«Միացյալ Նահանգները երկկողմ հարաբերությունների լավացման ուղիներ փնտրելու փոխարեն, ինչը քննարկվել է Հելսինկիում կայացած գագաթնաժողովի ընթացքում, ողջ ուժերը ներդրել է իրավիճակն ավելի սրելու գործին։ Այս ֆոնին տարօրինակ է ամերիկյան կողմի հայտարարությունները Մոսկվայի հետ հարաբերությունները լավացնելու պատրաստակամության մասին։ Սա բացահայտ երեսպաշտություն է։ Վաշինգտոնի քայլերը խոսում են տրամագծորեն հակառակի մասին», - շարունակել է ՌԴ ԱԳՆ ներկայացուցիչը։

Հիշեցնենք, որ օգոստոսի 8-ին ամերիկյան վարչակազմը հայտարարել էր Ռուսաստանի դեմ նոր պատժամիջոցներ սահմանելու մասին՝ կապված բրիտանական Սոլսբերիում տեղի ունեցած միջադեպի հետ, որի ժամանակ, իբր, օգտագործվել է քիմիական զենք։

Ամերիկյան NBC հեռուստաալիքի փոխանցմամբ՝ պատժամիջոցների առաջին փաթեթը ենթադրում է էլեկտրական սարքավորումների և երկակի նշանակության պարագաների՝ ՌԴ արտահանման ամբողջական արգելք։ Երկրորդ փաթեթը կարող է ներառել դիվանագիտական հարաբերությունների մակարդակի իջեցում և ամերիկյան ապրանքների՝ ՌԴ արտահանման ամբողջական արգելք։ Հնարավոր՝ «Աերոֆլոտ» ընկերությանն արգելվի թռիչքներ իրականացնել ԱՄՆ։

Աhttp://tass.ru/politika/5443363ղբյուր՝