Մանբիջի վերաբերյալ ճանապարհային քարտեզը պետք է իրականացվի մինչև այս տարվա վերջ․ Չավուշօղլու

Մանբիջ քաղաքի վերաբերյալ ճանապարհային քարտեզը, որը կազմվել էր Անկարայի և Վաշինգտոնի կողմից, պետք է իրականացվի մինչև այս տարվա վերջ։ Այս մասին CNNTurk-ի եթերում հայտարարել է Թուրքիայի արտաքին գործերի նախարար Մևլութ Չավուշօղլուն։

««Ազգային ինքնապաշտպանական ուժեր» զորամիավորումը վտանգ է ներկայացնում մեզ համար։ Մենք բազմիցս ասել ենք, որ մեզնից կախված ամեն ինչ անելու ենք այդ ահաբեկչական խմբավորման չեզոքացնելու համար։ Մանբիջի վերաբերյալ ճանապարհային քարտեզը պետք է իրականացվի մինչև այս տարվա վերջ», - ասել է Չավուշօղլուն՝ հավելելով, որ իրենք ԱՄՆ-ի հետ համագործակցում են ահաբեկչական խմբավորումների դեմ պայքարում։

Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Մանբիջի վերաբերյալ Վաշինգտոնի և Անկարայի ճանապարհային քարտեզն իրագործվում է այնպես, ինչպես հարկավոր է։ Նա նշել էր նաև, որ քրդական զորամիավորումները պետք է լքեն այս բնակավայրը։

Նոյեմբերի սկզբին Թուրքիայի և ԱՄՆ-ի զինված ուժերը սկսել են համատեղ հերթապահություն իրականացնել Մանբիջում, որը գտնվում է Հալեպից 40 կիլոմետր հեռու։

Թուրքիայի նախագահը դեռ ամիսներ առաջ հայտարարել էր, որ ցանկանում է մեծացնել անվտանգության գոտին Մանբիջից մինչև Ջերաբլուս։