Ֆրանսիայում բողոքի ակցիաներն սկսելուց ի վեր ձերբակալվել է ավելի քան 4500 մարդ․ AFP
Ֆրանսիայում «դեղին ժիլետներ» շարժման կազմակերպած բողոքի ակցիաների ընթացքում ձերբակալվածների թիվը հասել է ավելի քան 4500-ի։ Այս մասին գրում է AFP գործակալությունը՝ հղում կատարելով իրավապահների տրամադրած տվյալներին։
Աղբյուրի փոխանցմամբ՝ այս մարդկանցից 4099-ը կալանքի տակ են «բռնություն գործադրելու դավադրության» և «հանցագործություն հրահրելու» մեղադրանքով։
Հիշեցնենք, որ նոյեմբերի 17-ից Ֆրանսիայում ընթանում են բողոքի ակցիաներ, որոնք կազմակերպել են «դեղին ժիլետներ» կոչվող շարժումը։ Նրանք դժգոհում են վառելիքի գների թանկացման և հարկերի ավելացման դեմ։
Բողոքի ակցիաները երբեմն ուղեկցվում են անկարգություններով և իրավապահների հետ բախումներով։ Չնայած վերջին շրջանում իշխանություների կողմից կատարված զիջումներին հարկերի և նվազագույն աշխատավարձի չափի վերաբերյալ, «դեղին ժիլետները» պատրաստվում են շարունակել իրենց ակցիաները։
Նախօրեին Ֆրանսիայի նախագահ Էմանուել Մակրոնը հանդիպել է քաղաքական կուսակցությունների և միավորումների ներկայացուցիչների հետ, սակայն ճգնաժամային իրավիճակից դուրս գալու որևէ տարբերակ չի գտնվել։