Լավրովը մեկնաբանել է Սիրիայից ամերիկյան զորքերի դուրսբերման մասին Թրամփի որոշումը

Սիրիայում ԱՄՆ-ի ապօրինի ռազմական ներկայության հարցը լուծելը հեշտ չի լինելու։ Այս մասին Ռիա Նովոստի-ի հետ հարցազրույցի ժամանակ հայտարարել է Ռուսաստանի արտաքին գործերի նախարար Սերգեյ Լավրովը։

«Սիրիայում ԱՄՆ-ի ապօրինի ռազմական ներկայության հարցը լուծելն այդքան էլ հեշտ չէ։ Վաշինգտոնը մշտապես նոր պայմաններ է առաջ քաշում, խախտում է Սիրիայի ինքնիշխանությունը, անկախությունը և տարածքային ամբողջականությունը՝ չնայած, որ այս բոլոր սկզբունքներն ամրագրված են ՄԱԿ-ի Անվտանգության Խորհրդի հիմնական բանաձևերում։ Տեսնենք՝ ինչ դուրս կգա նախագահ Թրամփի՝ զորքերը դուրս բերելու մասին հայտարարության տակից», - ասել է Լավրովը։

Հիշեցնենք, որ դեկտեմբերի 19-ին ԱՄՆ նախագահ Դոնալդ Թրամփը հայտարարել էր Սիրիայում Իսլամական պետության դեմ վերջնական հաղթանակի և ամերիկյան զորքերն արաբարական այս երկրից դուրս բերելու մասին։

Ավելի ուշ Սպիտակ տան մամուլի խոսնակ Սառա Սանդերսը հայտարարել է, որ ԱՄՆ-ն արդեն սկսել է զորքերի դուրսբերումը Սիրիայի տարածքից, սակայն սա և ԻՊ-ի դեմ հաղթանակը չի նշանակում, որ միջազգային կոալիցիան դադարելու է գոյություն ունենալ։

Ամերիկացի պաշտոնյաների տվյալներով՝ պետքարտուղարության աշխատակիցները 24 ժամվա մեջ դուրս են բերվել Սիրիայից, իսկ զորախմբի դուրսբերումը տեղի կունենա 60-ից 100 օրվա ընթացքում։