Պետք է փոփոխություններ կատարել ՄԱԿ-ի Անվտանգության խորհրդի կազմում․ Գերմանիայի ԱԳ նախարար
Գերմանիայի արտաքին գործերի նախարար Հայկո Մաասը DPA լրատվականին տված հարցազրույցի ժամանակ խոսել է ՄԱԿ-ի Անվտանգության խորհրդում բարեփոխումներ կատարելու անհրաժեշտության մասին։
Ինչպես նշել է Գերմանիայի արտաքին քաղաքական գերատեսչության ղեկավարը, ՄԱԿ-ի Անվտանգության խորհուրդն «այլևս չի համապատասխանում արդիականության ոգուն»։
«Ես կարծում եմ, որ աշխարհում ուժերի հարաբերակցությունը պետք է ավելի լավ արտացոլվի, քան այժմ։ Իմ կարծիքով՝ մեր պատասխանատվությունը բարձրանում է։ Մեզնից սպասելիքները երբեք այդքան մեծ չեն եղել, ինչքան հիմա», - նշել է Մաասը։
Նա խոսել է նաև Մերձավոր Արևելքում հակամարտությունների կարգավորմանն ուղղված դիվանագիտական ջանքերի մասին։ Անդրադառնալով Գերմանիայի ռազմական մասնակցության ընդլայնմանը՝ ԱԳ նախարարը նշել է, որ «Բունդեսվերի հզորությունը պետք է օգտագործվի այնպես, որ այն երբեք չծանրաբեռնվի»։
Լրատվականը հիշեցնում է, որ առաջիկա հունվարի 1-ից Գերմանիան երկու տարով դառնում է ՄԱԿ-ի Անվտանգության խորհրդի ոչ մշտական անդամ։
«Շնորհիվ անդամակցությանը ՄԱԿ-ի ԱԽ-ին, մենք ավելի ենք մոտենում հակամարտությունների կարգավորման գործին։ Գերմանիայի ձայնը լսելի կլինի խնդիրների լուծման գործում։ Մենք չպետք է խուսափենք բարդ լուծումներից», - ասել է նախարարը։
Abendzeitung պարբերականը գրում է, որ ՄԱԿ-ի Անվտանգության խորհրդում բարեփոխումներ կատարելու մասին խոսակցությունները պտտվում են դեռ 90-ականներից։ Գերմանիան Ճապոնիայի, Բրազիլիայի և Հնդկաստանի հետ միասին հանդես է գալիս խորհրդի մշտական անդամների կազմը մեծացնելու օգտին։