ԱՄՆ-ն իր զորքերը Սիրիայից դուրս է բերում Անկարայի քայլերի շնորհիվ․ Չավուշօղլու

Միացյալ Նահանգները Սիրիայից զորքերը դուրս բերելու մասին որոշումը կայացրել է շնորհիվ Թուրքիայի նախաձեռնած քայլերի։ Այս մասին հայտարարել է Թուրքիայի արտաքին գործերի նախարար Մևլութ Չավուշօղլուն։

«Թուրքիայի գործոնն առանցքային էր Սիրիայից ամերիկյան զորքերը դուրս բերելու որոշման մեջ։ Շնորհիվ մեր կայացրած որոշումների՝ Միացյալ Նահանգները դուրս է բերում իր զորքերն այստեղից», - Չավուշօղլուի խոսքերը մեջբերել է Milliyet-ը։

Հիշեցնենք, որ դեկտեմբերի 19-ին ԱՄՆ նախագահ Դոնալդ Թրամփը հայտարարել էր Սիրիայում Իսլամական պետության դեմ վերջնական հաղթանակի և ամերիկյան զորքերն արաբարական այս երկրից դուրս բերելու մասին։

Ավելի ուշ Սպիտակ տան մամուլի խոսնակ Սառա Սանդերսը հայտարարել է, որ ԱՄՆ-ն արդեն սկսել է զորքերի դուրսբերումը Սիրիայի տարածքից, սակայն սա և ԻՊ-ի դեմ հաղթանակը չի նշանակում, որ միջազգային կոալիցիան դադարելու է գոյություն ունենալ։

Ամերիկացի պաշտոնյաների տվյալներով՝ պետքարտուղարության աշխատակիցները 24 ժամվա մեջ դուրս են բերվել Սիրիայից, իսկ զորախմբի դուրսբերումը տեղի կունենա 60-ից 100 օրվա ընթացքում։